हैदराबाद मनपा निवडणूक:भाजपची 4 वरून 48 जागी मुसंडी, एमआयएमला 44 जागा

हैदराबादचे भाग्यनगर असे नामांतर करण्याचे सूतोवाच करणाऱ्या भाजपला तेथील मनपा निवडणुकीत बहुमत मिळू शकले नाही. मात्र पक्षाने ४ जागांवरून ४८ जागा जिंकण्यापर्यंतची मोठी मजल मारली आहे. सर्वात मोठा पक्ष तेलंगण राष्ट्र समितीला (टीआरएस) ५५ जागा व असदुद्दीन ओवेसी यांच्या एमआयएमने ४४ जागा जिंकल्या. भाजपने आपल्या जागांत १२ पटींनी वाढ केली आहे. मनपा निवडणुकीत भाजपने संपूर्ण ताकद पणाला लावत केंद्रीय गृहमंत्री अमित शहा, राष्ट्रीय अध्यक्ष जे.पी. नड्डा व इतर केंद्रीय मंत्र्यांना प्रचारात उतरवले होते. दरम्यान, यूपीतील विधान परिषद निवडणुकीत भाजपने ६ पैकी ३ जागा जिंकल्या. मात्र वाराणसीत समाजवादी पार्टीची सरशी झाली.

यूपी : वाराणसी, गोरखपुरात भाजपला पराभवाचा साधा अंदाजही घेता आला नाही
यूपीत विधान परिषदेच्या ६ शिक्षक मतदारसंघांतील निवडणुकीत भाजपने ३ जागा जिंकल्या आहेत. प्रथमच भाजपचे शिक्षक आमदार विधान परिषदेत जात आहेत. भाजप उमेदवारांनी मीरत, बरेली-मुरादाबाद आणि लखनऊ शिक्षक मतदारसंघांत विजय मिळवला. आग्रा व गोरखपूर-फैजाबादमध्ये अपक्ष तर वाराणसीत समाजवादी पार्टीच्या उमेदवाराची सरशी झाली. येथील जागांचा अंदाज लावण्यात भाजपला सपशेल अपयश आले.

हैदराबाद : मनपात येतात पाच लोकसभा आणि २४ विधानसभा मतदारसंघ
ग्रेटर हैदराबाद मनपा (जीएचएमसी) देशातील सर्वात मोठ्या मनपांपैकी एक आहे. त्यात ४ जिल्हे आहेत. त्यात तेलंगणचे ४ लोकसभा व २६ विधानसभा मतदारसंघ आहेत. २०१८ विधानसभा निवडणुकीत काँग्रेस येथे मतटक्क्यात दुसऱ्या स्थानी असली तरी त्याचे विजयात रूपांतर होऊ शकले नव्हते. ६ महिन्यांनी लोकसभा निवडणुकीत भाजपला सर्वाधिक लाभ झाला होता. राज्यात सक्षम विरोधी पक्ष नसल्याचा फॅक्टर भाजपसाठी फायदेशीर ठरत आहे.