खळबळजनक:मल्लिकार्जुन खरगेंची कुटुंबीयांसह हत्या करण्याचा भाजप नेत्याचा कट, काँग्रेस नेते रणदीपसिंह सुरजेवाला यांचा आरोप

कर्नाटक विधानसभा निवडणुकीच्या प्रचाराच्या शेवटच्या टप्प्यात आरोप-प्रत्यारोपांचे युद्ध तीव्र झाले आहे. सत्ताधारी भारतीय जनता पक्ष (भाजप) आणि काँग्रेसच्या नेत्यांमधील वादाला आता वैयक्तिक हल्ल्याचे स्वरूप आले आहे. मल्लिकार्जुन खरगे आणि त्यांच्या कुटुंबीयांच्या हत्येचा भाजप नेत्याने कट रचल्याचा आरोप काँग्रेस नेते रणदीप सिंह सुरजेवाला यांनी केला आहे.

रणदीप सिंह सुरजेवाला यांनी शनिवारी बंगळुरूमध्ये सांगितले की, भाजप नेते हे मल्लिकार्जुन खरगे आणि त्यांचे संपूर्ण कुटुंब ठार करण्याच्या प्रयत्नात आहेत. त्यांनी आरोप केला की, पीएम मोदींच्या आवडत्या चित्तापूरच्या एका नेत्याने मल्लिकार्जुन खरगे आणि त्यांच्या कुटुंबीयांच्या हत्येबाबत वक्तव्य केले आहे. मल्लिकार्जुन खरगे यांच्या हत्येचा कट रचण्याच्या पातळीपर्यंत भाजप आता झुकली आहे, असा आरोप सुरजेवाला यांनी केला.

दलित कुटुंबात जन्मलेले मल्लिकार्जुन खरगे भाजपला पचनी पडत नसल्याचे त्यांनी म्हटले आहे. रणदीप सिंह सुरजेवाला म्हणाले की, पीएम मोदींनी मल्लिकार्जुन खरगे यांची खिल्ली उडवली आहे. भाजप नेत्याने खरगे यांच्या निधनासाठी शुभेच्छा दिल्या आहेत. ते म्हणाले की, भाजप हतबल झाला असून ही निराशा आता धोकादायक पातळीवर पोहोचली आहे.

सुरजेवाला यांचा निवडणूक आयोगावरही निशाणा

रणदीप सिंह सुरजेवाला यांनी खरगे यांच्यावरील भाजप नेत्यांचे हल्ले हे कर्नाटकातील प्रत्येक नागरिकाच्या जीवनावर आणि प्रतिष्ठेवर हल्ला असल्याचे म्हटले आहे. त्यांनी निवडणूक आयोगावरही निशाणा साधत मुख्यमंत्री बसवराज बोम्मई, कर्नाटक पोलिसांना घेरले. याबाबत सुरजेवाला म्हणाले की, सीएम बोम्मई, कर्नाटक पोलीस आणि निवडणूक आयोग सर्वच याबाबत मौन बाळगून आहेत.

बी. एल. संतोष म्हणाले- ही काँग्रेसची निराशा

मल्लिकार्जुन खरगे यांच्या हत्येबाबत काँग्रेस नेते रणदीप सुरजेवाला यांच्या वक्तव्यावर भाजपचे सरचिटणीस (संघटन) बीएल संतोष यांनी प्रतिक्रिया दिली आहे. काँग्रेसच्या आरोपाला उत्तर देताना बीएल संतोष यांनी ही हताशा आणि निराशा असल्याचे म्हटले आहे. काँग्रेस नेत्यांनी समजूतदारपणा गमावला आहे, असे त्यांनी म्हटले आहे.

विशेष म्हणजे, कर्नाटक विधानसभा निवडणुकीच्या प्रचारादरम्यान मल्लिकार्जुन खरगे यांनी पंतप्रधान मोदींबद्दल केलेल्या वक्तव्यावरून भाजप नेत्यांकडून हल्लाबोल झाला होता. मल्लिकार्जुन खरगे यांनी पंतप्रधान मोदींची तुलना विषारी सापाशी केली होती. या वक्तव्यानंतर भाजप नेत्यांनी खरगे यांच्याविरोधात आघाडी उघडली होती.

10 मे रोजी मतदान

कर्नाटक विधानसभेच्या निवडणुकीचा प्रचार जोरात सुरू आहे. कर्नाटकात विधानसभेच्या 224 जागांसाठी 10 मे रोजी मतदान होणार आहे. 13 मे रोजी मतमोजणी होणार असून त्याच दिवशी निवडणुकीचा निकालही जाहीर होणार आहे. कर्नाटक निवडणुकीचा प्रचार 8 मे रोजी सायंकाळी 5 वाजता संपणार आहे.

कर्नाटक निवडणुकीशी संबंधित या बातम्याही वाचा...

कर्नाटकात कॉंग्रेसचा जाहीरनामा:बजरंग दल, PFI वर बंदी घालू; दरमहा 200 युनिट फ्री वीज, महिलांना 2 तर बेरोजगारांना 3 हजार देणार

भारतीय जनता पक्षाच्या पाठोपाठ आता काँग्रेसनेही कर्नाटक विधानसभेसाठी आपला जाहीरनामा जाहीर केला आहे. काँग्रेस पक्षाने सरकार आल्यास बजरंग दल आणि पीएफआयवर बंदी घालण्याचे आश्वासन दिले आहे. तसेच प्रत्येक कुटुंबाला 200 युनिट मोफत वीज देण्याचे आश्वासन दिले. याशिवाय कुटुंबातील प्रत्येक महिला प्रमुखाला दरमहा दोन हजार रुपये देण्याची घोषणा केली. महिलांना राज्य सरकारी बसमध्ये मोफत प्रवास करण्याचे आश्वासनही दिले आहे. येथे वाचा सविस्तर बातमी

कर्नाटक निवडणूक:भाजपचा जाहीरनामा प्रसिद्ध; समान नागरी संहितेचे आश्वासन, बीपीएल कुटुंबांना 3 स्वयंपाकाचे गॅस सिलिंडर मोफत

कर्नाटकात 10 मे रोजी होणाऱ्या विधानसभा निवडणुकीसाठी भाजपने सोमवारी आपला जाहीरनामा 'प्रजा ध्वनी' प्रसिद्ध केला. पक्षाचे अध्यक्ष जेपी नड्डा यांनी बंगळुरू येथे जाहीरनाम्याचे प्रकाशन केले. पक्षाने जाहीरनाम्यात समान नागरी संहितेचे आश्वासन दिले आहे. यासोबतच दारिद्र रेषेखालील कुटुंबांना 3 स्वयंपाकाचा गॅस सिलिंडर मोफत देण्याचे आश्वासनही देण्यात आले आहे. येथे वाचा सविस्तर बातमी