चक्रीवादळ असनी अपडेट्स:विशाखापट्टणममध्ये 23 आणि चेन्नईमध्ये 10 उड्डाणे रद्द, 125 किमी प्रतितास वेगाने वाहू शकतात वादळी वारे

वर्षातील पहिले चक्रीवादळ असनी मंगळवारी पश्चिम बंगाल आणि ओडिशा किनारी भागात आपला प्रभाव पाडत आहे. हवामान विभागाने दिलेल्या माहितीनुसार बंगाल आणि ओडिशाच्या सागरी भागात 90 ते 125 किमी प्रतितास वेगाने वादळी वारे वाहू शकतात. यादरम्यान अनेक ठिकाणी पाऊसही पडेल. या वादळाचा प्रभाव बिहार, झारखंड, छत्तीसगडमध्येही राहील. 11 ते 13 मे या कालावधीत येथे पाऊस पडेल, तसेच जोरदार वारे वाहतील.

दरम्यान, खराब हवामानामुळे मंगळवारी आंध्र प्रदेशातील विशाखापट्टणम विमानतळावरून 23 उड्डाणे टेक ऑफ आणि लँडिंग रद्द करण्यात आली आहेत. त्याचवेळी चेन्नई विमानतळानेही 10 उड्डाणे रद्द केली आहेत. यामध्ये हैदराबाद, विशाखापट्टणम, जयपूर आणि मुंबईला जाणाऱ्या विमानांचा समावेश आहे.

हवामान केंद्र भुवनेश्वरच्या मते, ओडिशातील मलकानगिरी, गजपती, गंजम आणि पुरी जिल्ह्यात येत्या 24 तासांत मुसळधार पाऊस पडण्याची शक्यता आहे. मच्छिमारांना 13 मे पर्यंत समुद्रकिनाऱ्यापासून दूर राहण्याचा इशारा देण्यात आला आहे.

असनी संबंधित नवीन अपडेट्स…

24 तासांत कमकुवत होईल असनी

असनी चक्रीवादळ 10 मेच्या रात्रीपर्यंत वायव्य दिशेने पुढे सरकणार आहे. त्यानंतर ते ओडिशा किनार्‍यापासून ईशान्येकडे वायव्य बंगालच्या उपसागराकडे वळेल. येत्या 24 तासांत ते कमकुवत होण्याची शक्यता आहे.

पुढील 24 तासांतील हवामानाची स्थिती...

पश्चिम बंगालमध्ये वादळाचा इशारा

त्याच वेळी, IMD कोलकाता ने पश्चिम बंगालमधील हावडा, कोलकाता, हुगळी आणि पश्चिम मिदनापूर जिल्ह्यांमध्ये गडगडाटासह हलका पाऊस पडण्याची शक्यता वर्तवली आहे. वादळाच्या काळात लोकांना सुरक्षित ठिकाणी राहण्याचा सल्ला देण्यात आला आहे.

ओडिशाचे 4 बंदर धोक्याचे क्षेत्र घोषित

ओडिशाचे मदत आयुक्त पीके जेना यांनी सांगितले की, राज्यातील चार बंदरे पारादीप, गोपालपूर, धामरा आणि पुरी यांना डेंजर झोन म्हणून घोषित करण्यात आले आहे. या भागात NDRF आणि ODARF तैनात करण्यात आले आहेत. आम्ही समुद्रातील सर्व मच्छिमारांना सतर्कतेचा इशारा दिला आहे.

2022 मधील पहिले चक्रीवादळ

असनी हे या वर्षातील पहिले चक्रीवादळ आहे. यापूर्वी 2021 मध्ये 3 चक्रीवादळे आली होती. जवाद चक्रीवादळ डिसेंबर 2021 मध्ये आले होते. तर गुलाब चक्रीवादळ सप्टेंबर 2021 मध्ये धडकले, मे 2021 मध्ये यास चक्रीवादळाने बंगाल, बिहारसह अनेक राज्यांमध्ये कहर केला होता.

भविष्यातील चक्रीवादळांची नावे आधीच ठरलेली

चक्रीवादळ असनी हे श्रीलंकेने दिलेले नाव आहे ज्याचा अर्थ सिंहली भाषेत 'क्रोध' असा होतो. असनीनंतर निर्माण होणाऱ्या चक्रीवादळाला थायलंडने दिलेले नाव सीतारंग असे म्हटले जाईल. भविष्यात वापरल्या जाणाऱ्या नावांमध्ये भारतातील घुरनी, प्रोबाहो, झार आणि मुरासू, बिपरजॉय (बांगलादेश), आसिफ (सौदी अरेबिया), डिक्सम (येमेन) आणि तुफान (इराण) आणि शक्ती (श्रीलंका) यांचा समावेश आहे.