दिल्लीतील संतापजनक घटना:कारमधील मुलांनी मुलीला रस्त्यावरून 4 किमी नेले फरपटत, रक्तबंबाळ होऊन मृत्यू

दिल्लीतील कांझावाला भागात 31 डिसेंबरच्या रात्री 5 मुलांनी स्कूटीवरून जात असलेल्या मुलीला कारने धडक दिली. अपघातानंतर आरोपींनी कार भरधाव वेगात चालवून तेथून पळ काढला. त्यामुळे जखमी अवस्थेत तरुणी कारसह 4 किलोमीटरपर्यंत फरपटत गेली. तिच्या अंगावरील सर्व कपडेही फाटले होते. या घटनेत मुलीचा मृत्यू झाला. पोलिसांनी पाचही आरोपींना अटक केली आहे.

दिल्ली पोलिसांच्या बाह्य जिल्ह्याचे डीसीपी हरेंद्र सिंह यांनी याबाबत माहिती दिली आहे. रविवारच्या पहाटे तीनच्या सुमारास कंझावाला परिसरात एक मुलगी रस्त्याच्या कडेला विवस्त्र अवस्थेत पडल्याची माहिती पोलिसांना मिळाली. घटनेची माहिती मिळताच पोलिसांचे पथक घटनास्थळी पोहोचले असता, मुलीचा मृतदेह आढळून आला.

4 किमीपर्यंत नेले फरपटत

23 वर्षीय तरुणी आपल्या स्कूटीवरून घरी जात असल्याचे तपासात समोर आले आहे. त्याचवेळी एका कारमधील पाच मुले तिथून जात होती. मुलीच्या स्कूटीचा त्यांच्या कारला अपघात झाला. अपघातानंतर मुलीला जखमी अवस्थेत सुलतानपूर ते कंझावाला परिसरात सुमारे 4 किलोमीटरपर्यंत फरपटत नेण्यात आले. यातच तिचा मृत्यू झाला.

आरोपीची वैद्यकीय चाचणी

पोलिसांनी पाचही आरोपींना अटक केली आहे. कारही ताब्यात घेण्यात आली आहे. आरोपीविरुद्ध सदोष मनुष्यवधाचा गुन्हा दाखल करण्यात आला आहे. आरोपी दारूच्या नशेत होते की नाही हे तपासण्यासाठी त्यांच्या वैद्यकीय चाचण्या केल्या जात आहेत. सध्या पोलिसांना या घटनेशी संबंधित कोणतेही सीसीटीव्ही मिळालेले नाहीत.

स्वाती मालीवाल म्हणाल्या - सत्य समोर आले पाहिजे

याप्रकरणी दिल्ली महिला आयोगाच्या अध्यक्षा स्वाती मालीवाल यांनी प्रतिक्रिया दिली आहे. ते म्हणाले- 'दिल्लीच्या कंझावाला येथे एका मुलीचा विवस्त्र मृतदेह सापडला होता. असे सांगितले जात आहे की मद्यधुंद अवस्थेत काही मुलांनी तिच्या स्कूटीला कारने धडक दिली आणि तिला अनेक किलोमीटरपर्यंत ओढून नेले. हे प्रकरण अतिशय धोकादायक आहे, मी दिल्ली पोलिसांना हजेरीचे समन्स बजावत आहे. संपूर्ण सत्य समोर आले पाहिजे.

यासोबतच त्यांनी नववर्षासंदर्भात दिल्ली पोलिसांच्या तयारीवरही प्रश्न उपस्थित केले आहेत.