गुजरातच्या नव्या मुख्यमंत्र्यासाठी शर्यत:अहमदाबादमध्ये आज भाजपच्या विधिमंडळ पक्षाची बैठक, नरेंद्र सिंह तोमर केंद्रीय निरीक्षक म्हणून आले

गुजरातचे मुख्यमंत्री विजय रूपाणी हे शनिवारी पायउतार झाले. या बदलामागचे मुख्य कारण पुढील वर्षी होणाऱ्या विधानसभा निवडणुका असल्याचे सांगितले जात आहे. आता अहमदाबादमध्ये आज भाजप विधिमंडळ पक्षाची बैठक बोलावण्यात आली आहे, ज्यामध्ये नवीन मुख्यमंत्र्यांच्या नावाचा निर्णय घेतला जाऊ शकतो. केंद्रीय मंत्री नरेंद्र सिंह तोमर आणि प्रल्हाद जोशी या बैठकीला निरीक्षक म्हणून उपस्थित राहतील. तोमरही अहमदाबादला पोहोचले आहेत. गृहमंत्री अमित शहा आज अहमदाबादला पोहोचू शकतात.

दादर नगर हवेली, दमण-दीव आणि लक्षद्वीपचे प्रशासक प्रफुल्ल खोडाभाई पटेल, गुजरातचे उपमुख्यमंत्री नितीन पटेल आणि केंद्रीय आरोग्य मंत्री मनसुख मांडविया हे गुजरातच्या नवीन मुख्यमंत्र्यांच्या शर्यतीत आहेत. त्याचबरोबर केंद्रीय मत्स्यव्यवसाय आणि पशुसंवर्धन मंत्री पुरुषोत्तम रूपाला, आणि गुजरात भाजप अध्यक्ष सी.आर.पाटील यांच्या नावांचीही चर्चा आहे.

रुपाणी म्हणाले - 2022 च्या निवडणुका मोदीजींच्या नेतृत्वाखाली लढतील
राजीनामा दिल्यानंतर रुपाणी म्हणाले की, जी जबाबदारी मिळेल ती पूर्ण करू. आम्ही नरेंद्र मोदींच्या नेतृत्वाखाली राज्य निवडणुका लढतो आणि 2022 च्या निवडणुकाही त्यांच्या नेतृत्वाखाली लढल्या जातील.

26 डिसेंबर 2017 रोजी रूपाणी यांनी दुसऱ्यांदा गुजरातचे मुख्यमंत्री म्हणून शपथ घेतली होती. गुजरातमधील 2017 च्या निवडणुकीत भाजपने 182 पैकी 99 जागा जिंकून बहुमत मिळवले. त्यानंतर रुपाणी यांची विधिमंडळ पक्षाचे नेते आणि नितीन पटेल यांची उपनेते म्हणून निवड झाली होती. रुपाणी सध्या राजकोट (पश्चिम) मतदारसंघातून आमदार आहेत.

राजीनामा देण्याच्या 3 तास ​​आधी रुपाणी यांनी मोदींच्या कार्यक्रमाला हजेरी लावली
पंतप्रधान नरेंद्र मोदी यांनी शनिवारी सकाळी 11 वाजता अहमदाबादमधील सरदारधाम भवनचे व्हिडिओ कॉन्फरन्सिंगद्वारे उद्घाटन केले. सुमारे एक तास चाललेल्या या कार्यक्रमात विजय रुपाणी देखील सहभागी झाले होते, पण दुपारी 3 च्या सुमारास अचानक राजीनामा देण्याची घोषणा करून रुपाणी यांनी सर्वांना आश्चर्यचकित केले.