अजब लग्नाची गजब गोष्ट:गुजरातची तरुणी नवरदेवाशिवाय करणार लग्न, विधी करून हनिमूनलाही जाणार

भारतात लग्नाला सात जन्मांचे नाते मानले जाते. त्यामुळे हा दिवस खास बनवण्यासाठी लोक अनेक प्रयत्न करतात. गुजरातेतील क्षमा बिंदू 11 जून रोजी लग्न करणार आहे, परंतु तिच्या या लग्नाची सध्या सर्वत्र चर्चा होत आहे.

वास्तविक, वडोदरा येथे राहणारी 24 वर्षीय क्षमा बिंदू स्वतःशी लग्न करणार आहे. या लग्नात विधी, फेऱ्यांपासून ते पारंपारिक विधीपर्यंत सर्व काही असेल, पण नवरदेव असणार नाही. हा गुजरातचा पहिला एकल विवाह किंवा आत्मविवाह असल्याचे म्हटले जाते.

नवरी बनायचे आहे, पण लग्न करायचे नाही

या आत्म विवाहाबद्दल क्षमाचं म्हणणं आहे, 'मला कधीच लग्न करायचं नव्हतं, पण नवरी मात्र व्हायचं होतं. म्हणून मी स्वतःशीच लग्न करण्याचा निर्णय घेतला. स्व-प्रेमाचे उदाहरण मांडणारी मी कदाचित माझ्या देशातील पहिली मुलगी आहे."

महिलांनाही महत्त्व आहे

एका खासगी कंपनीत काम करणारी क्षमा म्हणते की, लोक या प्रकारचा विवाह अप्रासंगिक मानतील, परंतु मला हे सांगायचे आहे की महिलांनाही महत्त्व आहे. लोक त्यांच्या आवडत्या व्यक्तीशी लग्न करतात. माझे स्वतःवर प्रेम आहे म्हणूनच मी स्वत:शीच लग्न करत आहे.

हनिमूनसाठी गोव्याला जाणार

क्षमा बिंदूचे आई-वडीलही आपल्या मुलीच्या निर्णयावर खुश आहेत. त्यांनी या लग्नाला शुभेच्छाही दिल्या आहेत. गोत्रीच्या मंदिरात क्षमाने तिच्या लग्नासाठी पाच नवस लिहिले आहेत. लग्नानंतर क्षमाने हनिमूनसाठी गोव्याची निवड केली आहे, जिथे ती दोन आठवडे राहणार आहे.