धोकादायक ट्रेंड:जम्मू-काश्मीरमध्ये स्पर्धा परीक्षांची तयारी करणारे प्रतिभावान तरुणही भरकटून बनताहेत दहशतवादी

काश्मीर खोऱ्यातील परिस्थिती झपाट्याने बिघडत आहे. स्पर्धा परीक्षांची तयारी करणारे गुणवंत विद्यार्थी भरकटत असून दहशतवादी बनत आहेत, यावरून याचा अंदाज येतो. या धोकादायक ट्रेंडमुळे सुरक्षा यंत्रणांची चिंता वाढली आहे. त्रस्त पालक आपल्या मुलांना परत येण्याचे आवाहन करत आहेत. २०१९ मध्ये कलम ३७० रद्द केल्यानंतर प्रथमच परिस्थिती एवढी बिघडल्याचे आकडेवारीवरून दिसून येते. एप्रिलपर्यंत सुरक्षा यंत्रणांचा दावा होता की खोऱ्यात तरुणांचा दहशतवादी बनण्याचा ट्रेंड जवळपास संपला आहे. काही अंदाजानुसार, या वर्षाच्या पहिल्या चार महिन्यांत केवळ १४ तरुण दहशतवादी बनले. पण मेमध्ये सर्वकाही बदलले. दररोज तरुण गायब होऊन दहशतवादी संघटनांमध्ये सामील होत आहेत. सूत्रानुसार, मे महिन्यातच ३६ तरुण बेपत्ता झाले आहेत. ते १८-२५ वर्षांचे आहेत. कुटुंबीयांनी बेपत्ता होण्याचे कारण लिहून दिले आहे. एक भीती अशी आहे की असे अनेक तरुण बेपत्ता आहेत, ज्यांच्याबद्दल कुटुंबीयांनी अहवाल लिहिलेला नाही. अशा स्थितीत तरुणांची दहशतवादी बनण्याची यादी मोठी होऊ शकते. या वर्षात आतापर्यंत सुरक्षा दलांनी १०० दहशतवाद्यांचा खात्मा केला आहे. त्यापैकी मे महिन्यातच २८ दहशतवादी मारले गेले आहेत.

सैन्यात भरती होऊ इच्छिणाऱ्या काही तरुणांचीही दिशाभूल केली जाते
या वर्षी १६ एप्रिल रोजी श्रीनगरचा शकील वाणी नमाजसाठी घरातून बाहेर पडला आणि बेपत्ता झाला. २४ एप्रिल रोजी पुलवामा येथे त्याची हत्या झाली होती. १४ एप्रिल रोजी जैनापोरा शोपियान येथे झालेल्या चकमकीत चार दहशतवादी मारले गेले. हे चौघेही १० मार्च ते ९ एप्रिल दरम्यान बेपत्ता झाले होते. हे कुणीअशिक्षित तरुण नव्हते, तर हुशार विद्यार्थी होते. ७ जून रोजी शोपियानमध्ये राजा नदीम राथर याची हत्या झाली होती. तो बॅचलर ऑफ व्हेटरनरी सायन्सच्या अंतिम वर्षाचा विद्यार्थी होता. दहशतवादी बनलेल्या एका तरुणाने एनडीए परीक्षा उत्तीर्ण केली होती. कैसर अहमद डार हा बारावीच निकालाआधी बेपत्ता झाला होता.