कोरोनाचे संकट:एका महिन्यात सक्रिय रुग्ण 7.5 पटींनी वाढले; 7 महिन्यांतील ही सर्वाधिक संख्या, दिल्ली-महाराष्ट्रात सर्वाधिक रुग्ण

गेल्या एका महिन्यात देशात कोरोनाच्या सक्रिय रुग्णांमध्ये 7 पटीने वाढ झाली आहे. 3 मार्च रोजी अ‌ॅक्टिव्ह रुग्णांची संख्या 2686 होती, ती वाढून 20,219 झाली आहे. हा आकडा ऑक्टोबरनंतरचा सर्वाधिक आहे. यापूर्वी 23 ऑक्टोबर रोजी सक्रिय रुग्णांची संख्या 20,601 होती.

त्याच वेळी, गेल्या 24 तासात कोरोनाचे 3,641 नवीन रुग्ण आढळले आहेत. तसेच 6 जणांचा मृत्यू झाला आहे. दिल्ली, महाराष्ट्र, केरळ, गुजरात आणि हिमाचल प्रदेशातून सर्वाधिक कोरोनाबाधितांची संख्या समोर येत आहे. या राज्यांमध्ये एक हजाराहून अधिक अ‌ॅक्टिव्ह प्रकरणे समोर आली आहेत.

छत्तीसगडमध्ये 19 विद्यार्थींनींना कोरोनाची लागण

दुसरीकडे, सोमवारी छत्तीसगडमधील मुलींच्या वसतिगृहात 19 विद्यार्थिनींना संसर्ग झाल्याचे आढळून आले. सर्वांना क्वारंटाईन करण्यात आले आहे. या विद्यार्थिनींच्या संपर्कात आलेल्या इतर विद्यार्थ्यांचीही चौकशी करण्यात येत असल्याचे सांगण्यात येत आहे.

केरळमध्ये 4 हजार, महाराष्ट्र-गुजरातेत 2 हजारांहून अधिक सक्रिय रुग्ण
महाराष्ट्र आणि गुजरातमध्ये कोरोनाचा सर्वाधिक परिणाम दिसून येत आहे. या दोन्ही राज्यात सक्रिय रुग्णांची संख्या 2 हजारांहून अधिक आहे. सोमवारी महाराष्ट्रात 248 नवीन रुग्ण आढळले, तर एका रुग्णाचा मृत्यू झाला. त्याचवेळी, गुजरातमध्ये 231 नवीन कोरोनाबाधित रुग्ण आढळले, 349 रुग्ण बरे झाले. सुदैवाने येथे कोणाचाही मृत्यू झालेला नाही.

केरळबद्दल बोलायचे तर येथे सर्वाधिक 4,740 सक्रिय प्रकरणे नोंदवली गेली आहेत. कोरोनाच्या सुरुवातीच्या टप्प्यापासून राज्यात 71 हजारांहून अधिक मृत्यू झाले आहेत.

दिल्लीत पुन्हा केसेस वाढल्या, प्रशासन अलर्ट
दिल्लीत पुन्हा एकदा कोरोनाचा वेग वाढला आहे. सोमवारी येथे 293 नवीन रुग्णांची नोंद झाली. दोन जणांचा मृत्यूही झाला. 2 एप्रिल रोजी राजधानीत 429 नवीन रुग्णांची नोंद झाली. दिल्लीत पॉझिटिव्ह रेट 18% पेक्षा जास्त आहे. म्हणजेच, चाचणी दरम्यान 100 पैकी 18 लोकांना संसर्ग झाल्याचे आढळले आहे. कोरोनाचा धोका पाहता सरकार सतर्क असल्याचे दिल्ली सरकारचे म्हणणे आहे. कोरोनाला तोंड देण्यासाठी तयारीचा आढावा घेतला जात आहे.

नवीन प्रकार XBB 1.16 वाढत्या कोरोना केसेससाठी जबाबदार
केंद्रीय आरोग्य मंत्रालयाच्या एका अधिकाऱ्याने सांगितले की, कोरोना XBB 1.16 चे नवीन प्रकार देशात कोविडच्या नवीन प्रकरणांमध्ये वाढ होण्यास जबाबदार आहे.

दिल्लीतील वरिष्ठ डॉक्टर डॉ. संदीप नायर म्हणाले - कोरोनाचा जो ताण आला आहे तो अजून गंभीर झालेला नाही. कोरोना बाधित रुग्णांची संख्या वाढत आहे, परंतु लोकांमध्ये सौम्य लक्षणे दिसू लागली आहेत, बहुतेक लोक घरी औषधोपचार करून बरे होत आहेत. काळजी करण्यासारखे काही नाही.

हरियाणात वाढली चिंता; लग्न समारंभात मास्क बंधनकारक
हरियाणातील वाढत्या कोरोना संसर्गाच्या पार्श्वभूमीवर राज्य सरकारने नवीन मार्गदर्शक तत्त्वे जारी केली आहेत. सोमवारी आरोग्य विभागाच्या अधिकाऱ्यांसोबत झालेल्या बैठकीनंतर मंत्री अनिल विज यांनी ही माहिती दिली.

ते म्हणाले की लोकांनी कोरोना प्रोटोकॉलचे पालन करणे आवश्यक आहे, अधिकाऱ्यांनी त्याचे काटेकोरपणे पालन केले पाहिजे. जेथे 100 पेक्षा जास्त लोकांची गर्दी असेल, लग्न मिरवणूक किंवा इतर सार्वजनिक कार्यक्रम असतील तेथे त्यांनी मास्क घालणे आवश्यक आहे. यासंदर्भातील सूचना जारी करण्यात आल्या आहेत.

UP : ओमायक्रॉनचे XBB.1 उप प्रकार नोएडात सर्वाधिक अ‌ॅक्टिव्ह

नोएडामध्ये झपाट्याने वाढणाऱ्या कोविड प्रकरणांसाठी ओमायक्रॉनचे सब-व्हेरियंट XBB.1 जबाबदार आहे. अलीकडील प्रकरणांच्या जीनोम विश्लेषणातून हे उघड झाले आहे. नोएडातील बहुतेक रुग्णांमध्ये हे सर्व प्रकार आहेत. याशिवाय XBB.1.5, XBB.2.3 या उपप्रकारांचे रुग्णही आहेत. XBB.1 ने संसर्ग वेगाने पसरला आहे. त्याचा वेग पूर्वीपेक्षा 104 पट अधिक आहे.

केवळ भारतच नाही जगभरात कोरोनाचा कहर वाढतोय
वर्ल्ड हेल्थ ऑर्गनायझेशन (WHO) च्या अहवालात म्हटले आहे की, केवळ भारतातच नाही तर जगभरात कोरोनाची प्रकरणे वाढत आहेत. WHO च्या मते, दक्षिण पूर्व आशिया प्रदेशात नवीन प्रकरणांमध्ये अचानक वाढ झाली आहे. अहवालात असे म्हटले आहे की भारतात नवीन प्रकरणांमध्ये 437% वाढ नोंदवली गेली आहे आणि नवीन Omicron प्रकार XBB.1.16 यासाठी जबाबदार आहे. हा प्रकार BA.2.10.1 आणि BA.2.75 चा पुनर्संयोजन आहे.