सैनिक, त्यांच्या कुटुंबीयांनी वापरू नयेत चिनी मोबाइल:गुप्तचर संस्थांचा इशारा, अ‍ॅडव्हायझरी जारी

चीनसोबतच्या LAC वरील तणावाच्या पार्श्वभूमीवर गुप्तचर यंत्रणांनी एका अ‍ॅडव्हायझरीमध्ये म्हटले आहे की, देशाच्या सैनिकांनी चिनी मोबाइल फोन वापरू नयेत. सैनिकांच्या कुटुंबीयांनीही चिनी फोन वापरू नयेत. यासाठी सर्व संरक्षण युनिट्स आणि फॉर्मेशन्सना त्यांच्या जवानांना सावध करण्यास सांगण्यात आले आहे.

एजन्सीला मिळालेल्या दस्तऐवजांनुसार, लष्करी गुप्तचर संस्थांनी सैनिक आणि त्यांच्या कुटुंबीयांना सल्ला दिला आहे की त्यांनी भारताच्या शत्रू देशाचे फोन विकत घेऊ नयेत किंवा वापरू नयेत. चिनी कंपन्यांच्या मोबाइल फोनमध्ये मॉलवेअर आणि स्पायवेअर सापडल्याच्या घटना समोर आल्यामुळे ही सूचना जारी करण्यात आल्याचे सूत्रांनी सांगितले.

या मोबाइल फोन्सपासून धोका

गुप्तचर यंत्रणांनी देशाच्या सुरक्षेला धोका निर्माण होऊ शकतो अशा मोबाइल फोनची सूचीही दिली आहे. यामध्ये या चिनी कंपन्यांचे फोन समाविष्ट आहेत - विवो, ओप्पो, शिओमी, वन प्लस, ऑनर, रिअलमी, झेडटीई, जिओनी, आसुस, इन्फिनिक्स इत्यादी.

चिनी अ‍ॅपही हटवले

यापूर्वी गुप्तचर संस्था चिनी मोबाइल फोन अ‍ॅप्लिकेशनच्या विरोधात खूप सक्रिय होत्या. लष्करी जवानांच्या फोनमधून अनेक चिनी अ‍ॅप्स काढून टाकण्यात आले होते. संरक्षण दलांनीही त्यांच्या उपकरणांवर चिनी मोबाइल फोन आणि अ‍ॅप्लिकेशन्स वापरणे बंद केले आहे.

मार्च 2020 पासून भारत आणि चीनमध्ये तणाव आहे. दोन्ही देशांनी पूर्व लडाखपासून अरुणाचल प्रदेशपर्यंत LAC वर एकमेकांविरुद्ध फौजेची मोठ्या प्रमाणात तैनाती केली आहे.