दु:खद:झारखंडचे शिक्षणमंत्री जगरनाथ महतो यांचे निधन, चेन्नईत सुरू होते  उपचार; CM सोरेन म्हणाले- आमचा वाघ गेला

झारखंडचे शिक्षणमंत्री जगरनाथ महतो यांचे गुरुवारी निधन झाले. चेन्नई येथील रुग्णालयात उपचार सुरू असताना त्यांनी अखेरचा श्वास घेतला. 2020 मध्ये त्यांना कोरोना झाला होता. संसर्ग इतका वाढला होता की, त्याच्या फुफ्फुसाचे प्रत्यारोपण करावे लागले. तेव्हापासून ते आजारी होते. ते गिरिडीह जिल्ह्यातील डुमरी मतदार संघाचे आमदार होते.

14 मार्च रोजी विधानसभेच्या पावसाळी अधिवेशनात त्यांची प्रकृती अचानक बिघडली. त्यानंतर त्यांना जवळच्या एचईसी-पारस रुग्णालयात दाखल करण्यात आले.

सीटी स्कॅनसह सर्व प्रकारच्या तपासण्या करण्यात आल्या, ज्यामध्ये फुफ्फुसात सौम्य संसर्गाची लक्षणे आढळून आली. त्यांना आयसीयूमध्ये हलवण्यात आले. रात्री एअर अॅम्ब्युलन्सने त्यांना एमजीएम चेन्नई येथे उपचारासाठी दाखल करण्यात आले. दरम्यान, गुरूवारी उपचार सुरू असताना त्यांनी अखेरचा श्वास घेतला.

मुख्यमंत्री सोरेन म्हणाले - एक ग्रेट आंदोलक अन् लोकप्रिय नेता गमावला
मुख्यमंत्री हेमंत सोरेन यांनी ट्विट करून त्यांच्या निधनाबद्दल शोक व्यक्त केला आहे. त्यांनी लिहिले की आमचा टायगर जगरनाथ दा आता नाही ! आज झारखंडने आपला एक महान आंदोलक, लढाऊ, कष्टाळू आणि लोकप्रिय नेता गमावला आहे. आदरणीय जगरनाथ महतो जी यांचे चेन्नई येथे उपचारादरम्यान निधन झाले. ईश्वर दिवंगत आत्म्यास शांती देवो आणि शोकाकुल परिवाराला हा दु:खातून सावरण्याची शक्ती देवो

विरोधी पक्षाच्या नेत्यांची श्रद्धांजली
भारतीय जनता पक्षाचे विरोधी पक्षनेते बाबूलाल मरांडी यांनी ट्विटमध्ये लिहिले की, झारखंड सरकारचे मंत्री जगरनाथ महतो जी यांचे निधन चेन्नई येथील रुग्णालयात झाले आहे. प्रदीर्घ काळ आजाराचा सामना करताना योद्ध्याप्रमाणे लढणाऱ्या जगरनाथजींचे जाणे संपूर्ण झारखंडसाठी अत्यंत दुःखद आहे. व्यक्तिशः, राजकीय मतभेद असूनही मी त्यांच्या चैतन्यशीलतेचे नेहमीच कौतुक केले आहे.

दोन दिवसांचा राजकीय दुखवटा
शिक्षणमंत्री जगरनाथ महतो यांच्या स्मरणार्थ दोन दिवसांचा राजकीय दुखवटा पाळण्यात येणार आहे. आज 6 एप्रिल ते 7 एप्रिलपर्यंत राज्यभर शोक पाळण्यात येणार आहे. या कालावधीत ज्या इमारतींवर नियमितपणे राष्ट्रध्वज फडकवला जातो, त्या सर्व इमारतींवर राष्ट्रध्वज अर्ध्यावर फडकवला जाईल. या काळात कोणतेही राज्यकार्य होणार नाही.

यासोबतच 6 एप्रिल रोजी म्हणजेच आज राज्यातील सर्व कार्यालये बंद ठेवण्याचा निर्णय राज्य सरकारने घेतला आहे. कॅबिनेट सचिवालय आणि देखरेख विभागाने संयुक्त सचिव अखिलेश कुमार सिन्हा यांच्या स्वाक्षरीने ही अधिसूचना जारी केली आहे. त्याचवेळी आज होणारी मंत्रिमंडळ बैठकही पुढे ढकलण्यात आली आहे.