दहशतवाद्यांशी चकमक:राजौरीत 5 जवान शहीद, पूंछ हल्ल्यात सहभागी अतिरेक्याला सुरक्षा दलांनी घेरले, 8 तासांपासून एन्काउंटर सुरू

जम्मू-काश्मीरच्या राजौरीमध्ये शुक्रवारी सकाळपासून सुरक्षा दल आणि दहशतवाद्यांमध्ये सुरू असलेल्या चकमकीत लष्कराचे पाच जवान शहीद झाले. सकाळपर्यंत दोन जवान शहीद झाल्याची बातमी होती. जखमी झालेल्या आणखी 3 जवानांचा मृत्यू झाला आहे. अशा प्रकारे हा आकडा 5 झाला. तर आणखी एक जवान जखमी झाला आहे. 8 तासांहून अधिक काळ ही चकमक सुरू आहे. सकाळी साडेसात वाजता संघर्षाला सुरुवात झाली.

या भागात लष्कराने 2-3 दहशतवाद्यांना घेरले असल्याचे सूत्रांनी सांगितले. हे तेच दहशतवादी आहेत ज्यांचा पुंछमध्ये लष्कराच्या ट्रकवर झालेल्या हल्ल्यात हात होता. दोन्ही बाजूंनी गोळीबार सुरू आहे. दरम्यान, दहशतवाद्यांनी स्फोट केला, ज्यात लष्कराचे जवान शहीद झाले.

गोव्यातील पणजी येथे सुरू असलेल्या SCO बैठकीपूर्वी राजौरीतील चकमक सुरू झाली. या बैठकीत पाकिस्तानचे परराष्ट्र मंत्री बिलावल भुट्टोही सहभागी झाले आहेत. त्यांनी भारताच्या परराष्ट्रमंत्र्यांचीही भेट घेतली. या भेटीनंतर काही मिनिटांतच जयशंकर भुट्टोंसमोर म्हणाले – दहशतवाद हा जगासाठी सर्वात मोठा धोका आहे.

जिथे दहशतवाद्यांनी घेरले आहे तिथे डोंगर आणि जंगल

ही मोहीम 3 मे रोजी सुरू झाल्याचे लष्कराने सांगितले. राजौरीतील कांडीच्या जंगलात दहशतवादी असल्याची माहिती मिळाली होती. येथे शोधमोहीम सुरू करण्यात आली. शुक्रवारी सकाळी साडेसात वाजता सुरक्षा दल आणि दहशतवाद्यांमध्ये गोळीबार सुरू झाला. दहशतवादी एका गुहेत लपून बसले होते. ज्या भागात दहशतवादी लपले आहेत त्या भागात मोठ्या प्रमाणात झाडी आणि डोंगर आहेत.

या चकमकीत शहीद झालेल्या जवानांची संख्या वाढू शकते, असे लष्कराने म्हटले आहे. या चकमकीत काही दहशतवादीही ठार झाल्याची शक्यता आहे. राजौरीमध्ये इंटरनेट सेवा बंद करण्यात आली आहे.

72 तासांत 4 एन्काउंटर, 4 दहशतवादी ठार

1. राजौरी: शुक्रवारी सकाळी कंडी भागात सुरक्षा दले आणि दहशतवाद्यांमध्ये चकमक सुरू झाली. सूत्रांनी दिलेल्या माहितीनुसार, सुरक्षा दलांना येथे अनेक दहशतवादी असल्याची माहिती मिळाली होती. पुंछमध्ये लष्कराच्या ट्रकवर हल्ला करणारा तोच दहशतवादी असल्याचं सांगण्यात येत आहे. या हल्ल्यात 5 जवान शहीद झाले होते.

2. अनंतनाग: जिल्ह्यातील बिजबेहारा भागात गुरुवारी संध्याकाळी दहशतवाद्यांनी सुरक्षा दलांवर गोळीबार केला. या हल्ल्यात एक सुरक्षा रक्षक किरकोळ जखमी झाला असून त्याला रुग्णालयात पाठवण्यात आले आहे. या हल्ल्याची जबाबदारी काश्मीर टायगर्सने घेतली होती. ग्रुपने एका पोस्टमध्ये म्हटले आहे - या हल्ल्यात वरिष्ठ अधिकाऱ्यांसह अनेक सैनिक जखमी झाले आहेत. काश्मीर टायगर्स अशा आणखी हल्ल्यांची योजना आखत आहेत.

3. बारामुल्ला: येथे गुरुवारी सकाळी वानीगम पायेन क्रेरी भागात सुरक्षा दलांनी लष्कराच्या दोन दहशतवाद्यांना ठार केले. त्यांना या भागात दहशतवादी असल्याची माहिती मिळाली होती. त्यानंतर तेथे शोधमोहीम राबवण्यात आली. दहशतवाद्यांनी गोळीबार केला, त्यानंतर चकमक सुरू झाली.

4. माछिल: जम्मू-काश्मीर पोलिस आणि लष्कराने संयुक्त कारवाईदरम्यान बुधवारी माछिल सेक्टरमध्ये घुसखोरीचा प्रयत्न हाणून पाडला. या कारवाईत दोन दहशतवादीही ठार झाले.