होळीच्या दिवशी जपानी तरुणीची छेड काढणारे जेरबंद:तरुणी भारत सोडून बांगलादेशात गेली; बळजबरी रंगवणाऱ्या तिघांपैकी एक अल्पवयीन

दिल्लीत होळीच्या दिवशी जपानी मुलीचा विनयभंग करणाऱ्या 3 मुलांना दिल्ली पोलिसांनी ताब्यात घेतले आहे. त्यातील एक मुलगा अल्पवयीन आहे. पोलिसांनी दिलेल्या माहितीनुसार, आरोपींनी आपली चूक मान्य केली आहे. पहाडगंज येथे राहत असलेली जपानी तरुणी भारत सोडून बांगलादेशात गेल्याची माहिती पोलिसांनी दिली.

पोलिसांनी असेही सांगितले की त्यांनी जपानी दूतावासाला पत्र लिहून मुलीची ओळख पटवण्यासाठी मदत मागितली होती, परंतु दूतावासाने सांगितले की, त्यांना अशा कोणत्याही घटनेची माहिती नाही. उपपोलीस आयुक्त संजय कुमार सैन यांनी सांगितले की, व्हिडिओचे विश्लेषण करून योग्य माहिती मिळवली जात आहे.

मुलीला बळजबरी रंगवले, तिच्या डोक्यावर अंडी फोडली

मीडिया रिपोर्ट्सनुसार, ही मुलगी पहिल्यांदा होळी खेळण्यासाठी जपानहून भारतात आली होती. या घटनेचा व्हिडिओ मुलीने स्वतः शेअर केला होता, मात्र नंतर तो अकाऊंटवरून काढून टाकण्यात आला. आता हा व्हिडिओ सोशल मीडियावर व्हायरल होत आहे.

यात मुलांचा एक गट जपानी मुलीसोबत जबरदस्तीने होळी खेळताना दाखवला होता. एका मुलाने मुलीला बळजबरीने पकडून तिच्यावर रंग लावला. ती नाही म्हणत राहिली, पण मुलांनी ऐकले नाही. एका मुलाने डोक्यावर अंडीही फोडली.

मुलगी निघून जाऊ लागताच एका व्यक्तीने तिला पकडण्याचा प्रयत्न केला. अशा स्थितीत मुलीने त्याला थप्पडही मारली. शेजारी उभ्या असलेल्या लोकांनी मुलीला वाचवण्याचा प्रयत्न का केला नाही, असा प्रश्न सोशल मीडियावर अनेकांना पडला.

दिल्ली पोलिसांनी जपानी दूतावासाला पत्र लिहिले

याप्रकरणी पोलिसांनी जपानी दूतावासाला पत्र लिहिले असून, त्यात आरोपी मुलांवर कारवाई करण्याचे म्हटले आहे. दिल्ली पोलिसांनी सांगितले की, याप्रकरणी अद्याप कोणतीही तक्रार आलेली नाही. सेंट्रल डिस्ट्रिक्ट पोलीस त्याचा तपास करत आहेत.

दुसरीकडे, महिला आयोगाच्या अध्यक्षा स्वाती मालीवाल यांनी दिल्ली पोलिसांना नोटीस पाठवून याप्रकरणी आरोपींविरुद्ध गुन्हा दाखल करण्याची मागणी केली आहे. त्या म्हणाल्या की, होळीच्या दिवशी परदेशी व्यक्तीसोबत असे कृत्य होणे ही अत्यंत लाजिरवाणी बाब आहे.

स्वाती मालीवाल म्हणाल्या - कोणालाही सोडणार नाही

व्हिडिओवर नाराजी व्यक्त करत स्वाती मालीवाल यांनी ट्विट केले की, प्रत्येक वेळी हा व्हिडिओ पाहिल्यावर माझे रक्त खवळते. काहीही होवो, मी त्यांच्यापैकी कोणालाही सोडणार नाही, त्यापैकी प्रत्येक जण तुरुंगात पोहोचेल याची आम्ही खात्री करू.

मुस्लिम महिलांवर फेकले रंगाचे फुगे

एक दिवस आधी, दिल्लीतून असाच एक व्हिडिओ समोर आला होता, ज्यामध्ये काही लोक होळीच्या दिवशी मुस्लिम महिलांवर रंगाच्या पाण्याने भरलेले फुगे फेकताना दिसत होते. हा व्हिडिओ मीर फैसल नावाच्या व्यक्तीने ट्विट केला आहे.

या घटनेवरही स्वाती मालीवाल यांनी आक्षेप नोंदवला होता. व्हिडिओ रिट्विट करत त्यांनी लिहिले की, सोशल मीडियावर आणखी एक व्हिडिओ व्हायरल होत आहे, ज्यामध्ये मुस्लिम महिलांना फुगे आणि रंग फेकले जात असल्याचा दिसत आहे. होळीचा सुंदर सण हा अशा अश्लाघ्य कृत्यांसाठी नव्हे तर एकमेकांसोबत आनंद वाटण्याचा सण आहे.