औषधांच्या ओव्हरडोसने पतीच्या हत्येची कहाणी:पती तडफडत असताना पत्नीचा प्रियकराला व्हिडिओ कॉल, म्हणाला- इलाजाचे नाटक कर!

उत्तर प्रदेशच्या कानपूरमध्ये एक धक्कादायक घटना उजेडात आली आहे. प्रियकराशी लग्न करून पतीची कोट्यवधींची मालमत्ता हडप करण्यासाठी एका विवाहितेने आधी सासऱ्याला आणि नंतर पतीला औषधांचे ओव्हरडोज देऊन मारले. तीन महिन्यांपूर्वी सासर्‍याला ओव्हरडोज देऊन एवढ्या सफाईने ठार मारले की कोणाला संशयही आला नव्हता.

यानंतर महिलेने पतीची हत्या करण्यासाठी प्रियकराला तीन लाखांची सुपारी दिली. या जीवघेण्या हल्ल्यात पती बचावला. 5 दिवस रुग्णालयात दाखल होता, नंतर डिस्चार्ज मिळाल्यानंतर घरी पोहोचला. तेथे पत्नीने त्याला औषधांचा ओव्हरडोज दिला. दोन दिवसांनी पतीची तब्येत बिघडल्याने त्याला रुग्णालयात नेण्यात आले. तेथे त्याचा मृत्यू झाला. ऋषभ तिवारी असे मृताचे नाव आहे. घटना कल्याणपूरमधील शिवली रोडची आहे.

घटनेच्या 13 दिवसांनंतर पोलिसांनी शुक्रवारी सायंकाळी उशिरा या खळबळजनक खुनाचा खुलासा केला. यामध्ये आरोपी सपना आणि तिचा प्रियकर राज कपूर गुप्ता यांचे व्हॉट्सअॅप चॅट समोर आले आहे. ज्या रात्री ऋषभचा मृत्यू झाला, त्याच रात्री त्याला औषधांचा ओव्हरडोज देण्यात आल्याचे स्पष्ट झाले आहे. जेव्हा ऋषभला त्रास होऊ लागला आणि त्याचा श्वास थांबला तेव्हा सपनाने तिच्या प्रियकराला व्हिडिओ कॉल केला. मग व्हॉट्सअॅपवर ते बोललो.

पोलिसांनी या हत्येप्रकरणी पत्नी सपना, तिचा प्रियकर राजकुमार कपूर, त्याचा मित्र सतेंद्र आणि मेडिकल स्टोअर ऑपरेटर सुरेंद्र यादव यांना अटक केली आहे. या चौघांची शनिवारी कारागृहात रवानगी करण्यात येणार आहे. आता जाणून घ्या, या खून प्रकरणाची संपूर्ण हकिगत, पण त्याआधी ऋषभच्या मृत्यूच्या दिवशी सपनाने तिचा प्रियकर राज कपूर गुप्तासोबत केलेली चॅटिंग पाहा.

सपना- लाल औषध दिले आहे, किती वेळ लागेल?
राज कपूर- 30 मिनिटांत औषधाचा परिणाम संपूर्ण शरीरावर होईल.
सपना- (10 मिनिटांनी) हो, आता तडफडत आहे, असं वाटतंय की, जीव जाणार आहे.
राज कपूर- बरं पटकन व्हिडिओ कॉल कर….
सपना- आता काय करावं समजत नाहीये.
राज कपूर- घाबरू नकोस, आता नवर्‍याचा श्वास थांबणार आहे, तू त्याला पटकन दवाखान्यात घेऊन जा, उपचाराचे नाटक कर. त्यामुळे सर्वांना वाटेल की, आजाराने याचा मृत्यू झाला आहे.
सपना- कुठे आहेस?
राज कपूर - मी तुला नंतर भेटेन.

आता आम्ही तुम्हाला ऋषभ हत्याकांडाबद्दल सांगतो, ज्याच्या खुलाशाने पोलिसांनाही धक्का बसला...

लग्न आटोपून परतताना झाला हल्ला

कल्याणपूरच्या शिवली रोडवर राहणारा ऋषभ हा त्याचा मित्र मनीषसोबत 27 नोव्हेंबर रोजी चाकरपूर गावात लग्नासाठी स्कूटीवरून गेला होता. रात्री उशिरा घरी परतत असताना गावातील दोन नराधमांनी त्याच्यावर धारदार शस्त्राने जीवघेणा हल्ला केला. ऋषभ गंभीर जखमी झाला. त्याला स्वरूपनगर येथील खासगी रुग्णालयात दाखल करण्यात आले. सुमारे 5 दिवसांनी त्याला डिस्चार्ज मिळाला आणि तो घरी पोहोचला. दोन दिवसांनी ऋषभची तब्येत अचानक बिघडली. त्याला हॅलेट रुग्णालयात नेण्यात आले. तेथे त्याचा मृत्यू झाला.

मृत्यूपूर्वी ऋषभने शेजारी रामकृष्ण विश्वकर्माविरुद्ध सचेंडी पोलिस ठाण्यात एफआयआर दाखल केला होता. ऋषभचा रामकृष्णसोबत पैशांवरून वाद झाला होता. पोलिसांनी तपास केला असता शेजाऱ्याची कोणतीही भूमिका बाहेर आली नाही. दरम्यान, ऋषभचा मृत्यू झाला. या संपूर्ण प्रकरणाचा तपास करण्यासाठी पोलिसांनी विशेष पथक नेमले असता सत्य समोर आले.

नवऱ्याच्या दुर्लक्षामुळे जुने प्रेम जिवंत झाले

कल्याणपूरच्या घरात राहणाऱ्या सपनाच्या म्हणण्यानुसार तिचं आणि ऋषभचं पटत नव्हतं. दोघांमध्ये भांडणं व्हायची. याच कारणामुळे तिची रायपूर, नेरवाल येथे राहणाऱ्या राज कपूर गुप्ताशी जवळीक झाली.

दोघांमधील प्रेम इतकं वाढलं की संपूर्ण कुटुंबाची हत्या करून लग्न करून कोट्यवधींची मालमत्ता हडप करण्याची योजना त्यांनी तयार केली. सर्वप्रथम सपनाने पोलिस खात्यातून उपनिरीक्षक म्हणून निवृत्त झालेले सासरे किशोर चंद्र त्रिपाठी यांना औषधांचा ओव्हरडोज देऊन ठार केले. त्यानंतर पती ऋषभ त्रिपाठीच्या हत्येची योजना आखली.

सपनाने पतीच्या हत्येसाठी 3 लाख रुपयांची सुपारी दिली होती

खून प्रकरणाचा खुलासा करणारे डीसीपी पश्चिम विजय धुल यांनी सांगितले की, सपनाने पती ऋषभच्या हत्येसाठी प्रियकर राज कपूरला 3 लाख रुपयांची सुपारी दिली होती. भाभा नगरमध्ये राज कपूर याचे चाकेरी हे काचेचे दुकान आहे.

राज कपूरने त्याच्या दुकानात काम करणाऱ्या सतेंद्र विश्वकर्माला पैशाचे आमिष दाखवून आपल्या प्लॅनमध्ये समाविष्ट केले. सपनाच्या चौकशीत असे समोर आले की, तिनेच राज कपूरला 27 नोव्हेंबरला तिचा नवरा लग्नाला जाणार असल्याचे सांगितले होते. वाहनाचा क्रमांक दिला आणि व्हॉट्सअॅपवर लग्नपत्रिका पाठवली होती. तेथून परतताना तुम्ही सहज खून करू शकता, असेही तिने सांगितले होते.

स्कूटीचे पंक्चर केली, मग धारदार शस्त्राने केले वार

लग्नाला गेल्याची माहिती मिळताच राज कपूर आणि त्याचा साथीदार सतेंद्र चाकरपूर गावात लग्नसमारंभासाठी पोहोचले. यानंतर ऋषभची स्कूटी त्यांनी पंक्चर केली. तर दुसरीकडे लग्न आटोपून बाहेर आलेला ऋषभ आणि त्याचा मित्र मनीष यांनी कार पंक्चर झालेली पाहून ती ओढून नेण्यास सुरुवात केली. अंधारात पोहोचताच घातपाताच्या तयारीत असलेल्या राज कपूर आणि सतेंद्र यांनी धारदार शस्त्राने जीवघेणा हल्ला केला.

मारहाणीच्या वेळी ऋषभने आरडाओरड केली तेव्हा दोघेही खून न करता घटनास्थळावरून पळून गेले. ऋषभला गंभीर अवस्थेत जवळच्या खासगी रुग्णालयात दाखल करण्यात आले. 30 नोव्हेंबरला बरे वाटल्यानंतर त्याला हॉस्पिटलने डिस्चार्ज दिला.

सपनाने पुन्हा हत्येचा प्लान बी तयार केला

सुपारी देऊन ऋषभला मारण्याचा प्लॅन फसताच सपनाने प्लॅन बी तयार केला. मेडिकल स्टोअर ऑपरेटर सुरेंद्र यादव हे ऋषभच्या घरातच भाड्याने राहत होते. सपनाचे सुरेंद्रसोबतही संबंध होते. ऋषभ हा मधुमेहाचा रुग्ण होता. तिनी ही माहिती सुरेंद्रला दिली. पतीला मारण्याच्या योजनेत त्याचाही समावेश केला.

तिने सुरेंद्रकडून औषधे घेतली आणि जखमी पतीच्या औषधांसोबत ती द्यायला सुरुवात केली. शुगर पेशंट असतानाही ऋषभला ग्लुकोजची बाटली देऊ करण्यात आली. एवढेच नाही तर ऋषभला विषारी इंजेक्शनही देण्यात आले. यामुळे ऋषभची प्रकृती बिघडली. त्याचे अनेक अवयव निकामी झाले आणि 3 डिसेंबर रोजी त्याचे निधन झाले.

पोलिसांनी असा केला खुनाचा उलगडा

डीसीपी पश्चिम विजय धुल यांनी सांगितले की, जेव्हा ऋषभ त्रिपाठीवर जीवघेणा हल्ला झाला तेव्हा त्यांनी त्यांचे शेजारी रामकृष्ण विश्वकर्मा यांच्याविरुद्ध शत्रुत्वाच्या संशयावरून एफआयआर दाखल केला होता. तपासात त्यांची कोणतीही भूमिका असल्याचे आढळून आले नाही. दरम्यान, ऋषभचा मृत्यू झाला. तपासाला वेग आला.

ज्या ठिकाणी ही घटना घडली त्या ठिकाणी एक नंबर सतत सक्रिय आढळून आला. हा क्रमांक ऋषभच्या पत्नीच्या संपर्कात होता. घट्ट दुवा साधल्यानंतर खून प्रकरण उघडकीस आले. डीसीपीने सांगितले की जर शेजाऱ्यावर एफआयआर नसता तर ऋषभच्या हत्येचा कट कोणालाच कळला नसता.

आता कुटुंबात कोणीही उरले नाही, संपूर्ण मालमत्ता सपनाची

डीसीपी पश्चिम यांनी सांगितले की, हे संपूर्ण प्रकरण कल्याणपूर येथील न्यू शिवली रोड येथील रहिवासी किशोरचंद्र त्रिपाठी यांच्या कुटुंबाशी संबंधित आहे. किशोर चंद्रा हे यूपी पोलिसात इन्स्पेक्टर म्हणून तैनात होते. त्यांची पत्नी फूड इन्स्पेक्टर होती. सपनाच्या सासूचे अनेक वर्षांपूर्वी निधन झाले होते.

सपनाचे दोन वर्षांपूर्वी ऋषभसोबत लग्न झाले होते

सचेंडी पोलीस स्टेशन प्रभारी यांनी सांगितले की, सपना आणि ऋषभ यांचे फेब्रुवारी 2020 मध्येच लग्न झाले होते. या जोडप्याला मूलबाळ नाही. ऋषभ हा एकुलता एक मुलगा होता. तो संगणकाचे काम करायचा. वडिलांच्या निधनानंतर त्याच्याकडे कोट्यवधींची संपत्ती होती. त्याच्या मृत्यूनंतर ही संपूर्ण मालमत्ता सपना आणि तिच्या प्रियकराकडे गेली असती.