जम्मू-काश्मीर:कुलगाममध्ये लष्कर-ए-तोएबाच्या दोन दहशतवाद्यांनी केले आत्मसमर्पण, कुटुंबियांच्या आवाहानानंतर दोघांची शरणागती

जम्मू-काश्मीरमध्ये डीसीसी निवडणूकांच्या निकालांदरम्यान, कुलगाम जिल्ह्यात दहशतवादी आणि सुरक्षा दलात चकमक झाली. यावेळी लष्कर-ए-तोएबाच्या दोन स्थानिक दहशतवाद्यांनी आत्मसमर्पण केले आहे. कुटुंबियांननी आवाहान केल्यानंतर या दोघांनी आत्मसमर्पण केले आहे. या दोन्ही दहशतवाद्यांकडून पोलिसांनी दोन पिस्तुल आणि दारूगोळा जप्त केला आहे.

सैन्य आणि दहशतवाद्यांची चकमक होती. याच वेळी या दोन्ही दहशतवाद्यांच्या कुटुंबीयांना घटनास्थळी बोलावण्यात आले होते. येथे दोघांच्याही कुटुंबीयांनी त्यांना विनवणी केली. यानंतर त्यांनी सैन्यापुढे शरणागती पत्करली आहे. तसेच हे दोन्हीही दहशतवादी स्थानिकच आहेत.

जम्मू-काश्मीरमध्ये गेल्या अनेक दिवसांपासून दहशतवादी आणि सुरक्षा दलामध्ये चकमक होत असल्याचे समोर येत आहे. 13 डिसेंबर रोजी जम्मू-काश्मीरच्या पुंछमध्ये झालेल्या चकमकीमध्ये पाकिस्तानी दहशतवाद्यांना ठार करण्यात आले होते. तीन दहशतवाद्यांचा एक गट शोपियांकडे सीमा ओलांडत होते तेव्हाच ही चकमक झाली.