समन्स:कॉंग्रेस अध्यक्ष खरगेंना संगरूर न्यायालयाचा समन्स, बजरंग दलावर अवमानकारक वक्तव्य केल्याचा आरोप; 10 जुलैला 'हजर व्हा' आदेश

पंजाबच्या संगरूर न्यायालयाने काँग्रेसचे राष्ट्रीय अध्यक्ष मल्लिकार्जुन खरगे यांना मानहानीच्या एका प्रकरणात समन्स बजावले आहे. संगरूरचे रहिवासी आणि हिंदू सुरक्षा परिषद व बजरंग दल हिंदचे संस्थापक हितेश भारद्वाज यांनी दाखल केलेल्या याचिकेवर खरगे यांना हे समन्स बजावण्यात आले आहे.

हितेश भारद्वाज यांनी नुकत्याच पार पडलेल्या कर्नाटक निवडणुकीदरम्यान बजरंग दलाच्या विरोधात अपमानास्पद वक्तव्य केल्याबद्दल खरगे यांच्यावर 100 कोटी रुपयांचा मानहानीचा खटला दाखल केला आहे. स्थानिक न्यायालयाच्या दिवाणी न्यायाधीश (वरिष्ठ विभाग) रमणदीप कौर यांच्या न्यायालयाने 10 जुलै रोजी हजर व्हा, असा समन्स बजावला आहे.

याचिकाकर्त्याचा दावा
याचिकाकर्ते हितेश भारद्वाज यांनी दावा केला आहे की, काँग्रेसने बजरंग दलाची तुलना देशविरोधी संघटनांशी केली आहे. कर्नाटकात सत्तेवर आल्यानंतर बजरंग दलावर बंदी घालण्याचे आश्वासनही दिले.

भारद्वाज म्हणाले की, गुरुवारी जेव्हा त्यांनी जाहीरनाम्याच्या पृष्ठ क्रमांक-10 वर काँग्रेसने बजरंग दलाची देशविरोधी संघटनांशी तुलना केली आणि निवडणूक जिंकल्यास संघटनेवर बंदी घालण्याचे आश्वासन दिले, त्यामुळे त्यांनी न्यायालयात धाव घेतली.