आपल्या शहरातील ताज्या बातम्या आणि ई-पेपर मिळवा मोफत

Marathi News
National
54 Dead So Far; Status Stable At Present; 1100 People From The State Entered Assam

मणिपूर हिंसाचार:आतापर्यंत 54 जणांचा मृत्यू; सध्या स्थिती स्थिर; राज्यातील 1100 नागरिकांचे आसाममध्ये पलायन

24 दिवसांपूर्वी

कॉपी लिंक

मणिपूरमध्ये शनिवारी सकाळी परिस्थिती पूर्वपदावर आल्यानंतर लोकांनी आपल्या वाहनांमध्ये पेट्रोल भरण्यासाठी रांगा लावल्या.

मणिपूरमध्ये मैतेई आरक्षण वादावरून उसळलेल्या हिंसाचारात आतापर्यंत 54 जणांचा मृत्यू झाला आहे. त्याचबरोबर गोळ्या लागल्याने जखमी झालेल्या 100 हून अधिक लोकांवर सध्या RIMS इंफाळ आणि जवाहरलाल नेहरू इन्स्टिट्यूट ऑफ मेडिकल सायन्समध्ये उपचार सुरू आहेत. शुक्रवारपर्यंत मृत्यू व जखमींची कोणतीही माहिती समोर आली नव्हती.

शुक्रवारी मोबाईल इंटरनेट अनिश्चित काळासाठी बंद करण्यात आले. दंगलखोरांना गोळ्या घालण्याचे आदेश देण्यात आले, तसेच मणिपूरला जाणाऱ्या गाड्या थांबवण्यात आल्या. हिंसाचाराच्या पार्श्वभूमीवर राज्यातील 16 पैकी 8 जिल्ह्यांमध्ये संचारबंदी लागू करण्यात आली आहे.

मात्र, आता त्यात शिथिलता आणली जात आहे. जनजीवन सामान्य होत आहे. शनिवारी सकाळी दुकाने उघडली आणि रस्त्यावर गाड्या धावताना दिसल्या. या भागात लष्कर आणि आसाम रायफल्सचे सुमारे 10,000 जवान तैनात करण्यात आले आहेत.

सुरक्षा दलाचे जवान शनिवारी सकाळी इंफाळमध्ये गस्त घालतांना दिसून आले.

भीतीमुळे 1100 लोक आसाममध्ये

अधिकाऱ्यांनी शनिवारी सांगितले की, मणिपूरच्या जिरीबाम जिल्ह्यातील आणि लगतच्या भागातील 1,100 हून अधिक लोकांनी आंतरराज्य सीमा ओलांडून आसामच्या कछार जिल्ह्यात प्रवेश केला आहे. यातील बहुतांश लोक कुकी समाजाचे असून गुरुवारी त्यांच्यावर हल्ला करणाऱ्या आंदोलकांनी त्यांच्या घरांचीही तोडफोड केली असावी, अशी भीती त्यांना आहे. त्यामुळे ते त्यांच्या सुरक्षेसाठी कछारला पळून गेले आहेत.

मणिपूरमध्ये सुट्टीवर गेलेल्या सर्व सैनिकांनी ताबडतोब जवळच्या तळावर पोहोचावे - CRPF

सीआरपीएफने रजेवर गेलेल्या मणिपूरमधील सर्व जवानांना जवळच्या तळावर जाण्यास सांगितले आहे. वास्तविक, शुक्रवारी दुपारी सीआरपीएफच्या कोब्रा बटालियनच्या कमांडोला दहशतवाद्यांनी गोळ्या घालून ठार केले. ते रजेवर चुरचंदपूर येथील त्यांच्या गावी गेले होते. या घटनेनंतरच सीआरपीएफने मणिपूरमधील त्यांच्या गावी सुट्टीवर गेलेल्या सर्व जवानांना तेथे असुरक्षित वाटत नसल्यास त्यांच्या कुटुंबासह ताबडतोब जवळच्या तळावर पोहोचण्याचा संदेश पाठवला आहे.

3 एप्रिल रोजी हजारो लोक आदिवासींच्या मोर्चात सहभागी झाले होते, त्यांना नियंत्रित करण्यासाठी पोलिसांनी अश्रुधुराच्या नळकांड्या फोडल्या.

शुक्रवारी रात्री सैन्यासोबत झालेल्या चकमकीत पाच दहशतवादी ठार

पोलिसांनी सांगितले की, शुक्रवारी रात्री चुरचंदपूर जिल्ह्यात दोन चकमकी झाल्या. सायटोनमध्ये पहिली चकमक झाली, त्यात चार अतिरेकी मारले गेले. दुसरी चकमक टोरबांग येथे झाली, जिथे दहशतवाद्यांनी सुरक्षा दलांवर गोळीबार केला. प्रत्युत्तरादाखल केलेल्या कारवाईत एक अतिरेकी ठार झाला तर दोन राखीव दलाचे जवान जखमी झाले.

मणिपूरच्या हिंसाचारग्रस्त भागातून 13,000 लोकांची सुटका

सुरक्षा दलाच्या प्रवक्त्याने सांगितले की, सैन्याने चुराचंदपूर, मोरेह, ककचिंग आणि कांगपोकपी जिल्ह्यांचा ताबा घेतल्यापासून या भागांतून 13,000 हून अधिक लोकांची सुटका करण्यात आली आहे. ते म्हणाले की, गेल्या 12 तासांत बदमाशांनी इम्फाळ पूर्व आणि पश्चिम जिल्ह्यांमध्ये जाळपोळ करून वातावरण बिघडवण्याचा प्रयत्न केला, परंतु त्यांना जोरदार प्रत्युत्तर देऊन रोखण्यात आले आहे.

राज्यात कडक सुरक्षा व्यवस्था करण्यात आली असून, आतापर्यंत 13 हजार लोकांना शिबिरांमध्ये पाठवण्यात आले आहे.

इंडिगो एअरलाइनची मणिपूरमध्ये अतिरिक्त उड्डाणे

इंडिगो एअरलाइनने शनिवारी सांगितले की, मणिपूरमधील सध्याची परिस्थिती पाहता आम्ही 6 मे रोजी इंफाळ ते कोलकाता दोन अतिरिक्त उड्डाणे चालवू. यासह, इंडिगोने 4 मे ते 7 मे दरम्यानच्या उड्डाणे रीशेड्युलिंग आणि रद्द करण्याचे शुल्क माफ केले आहे.

4 मुद्द्यांमध्ये समजून घ्या, नेमका काय आहे संपूर्ण वाद

मणिपूरच्या सुमारे 3.8 लाख लोकसंख्येपैकी निम्म्याहून अधिक लोकसंख्या मैतेई समुदायाची आहे. मणिपूरच्या सुमारे 10% क्षेत्राचा समावेश असलेल्या इम्फाळ व्हॅलीमध्ये मैतेई समुदायाचे वर्चस्व आहे. नुकतेच मणिपूर उच्च न्यायालयाने राज्य सरकारला अनुसूचित जमातीमध्ये (एसटी) मैतेई समुदायाचा समावेश करण्याचे आदेश दिले आहेत.
मैतेई आरक्षण का मागत आहेत: मैतेई समुदायाचे लोक असा युक्तिवाद करतात की 1949 मध्ये भारतीय संघराज्यात विलीन होण्यापूर्वी त्यांना संस्थानात जमातीचा दर्जा होता. गेल्या 70 वर्षांत, मैतेई समाजाची लोकसंख्या 62 टक्क्यांवरून 50 टक्क्यांपर्यंत कमी झाली आहे. मैतेई समाज आपल्या सांस्कृतिक ओळखीसाठी आरक्षणाची मागणी करत आहे.
कोणाच्या विरोधात: मणिपूरमधील नागा आणि कुकी जमाती मैतेई समाजाला आरक्षण देण्याच्या विरोधात आहेत. नागांनी राज्याच्या 90% क्षेत्रफळावर कब्जा केला आहे आणि कुकी राज्याच्या लोकसंख्येच्या 34% आहेत. त्यांचे म्हणणे आहे की राज्याच्या 60 विधानसभेच्या 40 जागा या आधीच मैतेई वर्चस्व असलेल्या इंफाळ खोऱ्यात आहेत. मणिपूरमध्ये राजकीयदृष्ट्या मैतेई समुदायाचे वर्चस्व आहे. नागा आणि कुकी जमातींना भीती आहे की एसटी प्रवर्गातील मैतेई आरक्षणामुळे त्यांच्या अधिकारांमध्ये फूट पडेल. सध्याच्या कायद्यानुसार मैतेई समुदायाला राज्यातील डोंगराळ भागात स्थायिक होण्याची परवानगी नाही.
नुकत्याच झालेल्या हिंसाचाराचे कारण आरक्षणच : मणिपूरमध्ये नुकत्याच झालेल्या हिंसाचाराचे कारण मैतेई आरक्षण असल्याचे म्हटले जाऊ शकते, परंतु गेल्या वर्षी ऑगस्टमध्ये मुख्यमंत्री बिरेन सिंह यांच्या सरकारने चुराचंदपूरच्या जंगल परिसरात राहणाऱ्या नागा आणि कुकी जमातींना घुसखोर ठरवून त्यांना हुसकावून लावण्याचे आदेश दिले. याचा नागा-कुकी समाजाला राग होता. मैतेई हिंदू आहेत, तर एसटी श्रेणीतील बहुतेक नाग आणि कुकी ख्रिस्ती धर्माचे पालन करतात.

अ‍ॅप उघडा

Our Divisions

This website follows the DNPA Code of Ethics.

फीडबॅक द्या