मनीष सिसोदिया 20 मार्चपर्यंत तिहार तुरुंगात:मद्य धोरण खटल्यात CBI ने नाही मागितली कोठडी, म्हटले-15 दिवसांनी गरज भासू शकते

दिल्लीच्या राऊज अव्हेन्यू कोर्टाने दिल्ली मद्य धोरण प्रकरणात अटक करण्यात आलेल्या मनीष सिसोदियांना 20 मार्चपर्यंत न्यायालयीन कोठडी सुनावली आहे. सिसोदिया यांना तिहारमध्ये ठेवण्यात येणार आहे. विशेष सीबीआय न्यायाधीश एमके नागपाल यांनी सिसोदिया यांना 14 दिवसांची न्यायालयीन कोठडी सुनावली.

तथापि, सीबीआयच्या वकिलांनी सांगितले की, सीबीआय सिसोदियांच्या पुढील कोठडीची मागणी सध्या करणार नाही, परंतु पुढील 15 दिवसांत पुन्हा कोठडी मागू शकते.

यापूर्वी 4 मार्च रोजी न्यायालयाने सिसोदिया यांच्या सीबीआय कोठडीत दोन दिवसांची (6 मार्च) वाढ केली होती, जी सोमवारी संपली. मात्र, सीबीआयने कोर्टाकडे तीन दिवसांची कोठडी मागितली.

सिसोदिया यांच्या जामीन अर्जावर न्यायालय 10 मार्च रोजी दुपारी 2 वाजता निकाल देणार आहे. त्यांना सीबीआयने 26 फेब्रुवारी रोजी अटक केली होती. 27 फेब्रुवारी रोजी ते न्यायालयात हजर झाले, जिथून सिसोदिया यांना 5 दिवसांच्या सीबीआय कोठडीत पाठवण्यात आले होते.

मागच्या सुनावणीदरम्यान कोर्टात झाले हे युक्तिवाद

CBI- सिसोदिया यांच्या कोठडीत तीन दिवसांची वाढ करावी.

कोर्ट - का? आता काय उरले आहे?

CBI- मनीष सिसोदिया यांची रोज रात्री 8 वाजेपर्यंत चौकशी केली जाते, पण ते तपासात सहकार्य करत नाहीत. आता त्याच्याकडून अनेक प्रश्नांची उत्तरे घ्यायची आहेत, याशिवाय त्यांना या खटल्यातील काही साक्षीदारांना सामोरे जावे लागणार आहे.

सिसोदिया यांचे वकील दयान कृष्णन - रिमांड देऊ नये. आम्ही तपासात सहकार्य करत नसल्याच्या कारणावरून CBI रिमांड मागू शकत नाही. पहिल्यांदा या आधारे रिमांड देणे पुरेसे होते, आता दिले तर अतिरेक होईल.

कोर्ट- रिमांड देणे चुकीचे आहे असे वाटत असेल तर त्या आदेशाला उच्च न्यायालयात आव्हान द्यायला हवे होते.

सिसोदिया यांचे दुसरे वकील मोहित माथूर - तीन दिवसांच्या रिमांडनंतर रिमांड अर्जात काही नवीन तथ्य यायला हवे होते, पण आजही तपास यंत्रणा तोच युक्तिवाद करत आहे, जो पहिल्या दिवशी दिला होता.

कोर्ट- तुम्हाला कोठडीत काही अडचण आहे का?

सिसोदिया- मला शारीरिकदृष्ट्या कोणतीही समस्या नाही. जेवणही वेळेवर मिळते, पण अधिकारी मला तोच प्रश्न वारंवार विचारतात. त्यामुळे मला मानसिक त्रास होत आहे. या छळातून मला वाचवा, अशी मी न्यायालयाला विनंती करतो.

कोर्ट - CBI मनीष सिसोदिया यांच्या समस्येकडे लक्ष द्या.

सिसोदिया यांचा युक्तिवाद- चौकशीत पूर्ण सहकार्य केले

3 मार्च रोजी सिसोदिया यांनी कनिष्ठ न्यायालयात जामीन अर्ज दाखल केला. या याचिकेत त्यांनी CBI चौकशीत सहकार्य केल्याचे लिहिले आहे. जेव्हा जेव्हा त्यांना बोलावले जाते तेव्हा ते आले होते. सर्व वसुली CBIने केली असल्याने त्याला आता कोठडीत ठेवण्याचे कोणतेही वैध कारण नाही, असा युक्तिवाद त्यांनी केला.

केजरीवाल म्हणाले- भाजप नेत्याच्या मुलाकडे मिळाले 8 कोटी रुपये, पकडले मात्र सिसोदियांना

4 मार्च रोजी दिल्लीचे मुख्यमंत्री केजरीवाल यांनी सिसोदिया यांच्या कोठडीत वाढ केल्याबद्दल कर्नाटकातील दावणगेरेंवर निशाणा साधला. केजरीवाल म्हणाले की, भाजप नेत्याचा मुलगा 8 कोटी रुपयांसह पकडला गेला, पण त्यांना अटक झाली नाही. पुढील वर्षी भाजप त्यांना पद्मभूषण देईल. त्यांच्या घरातून 8 कोटी रुपये सापडले असून मनीष सिसोदिया यांना अटक केली आहे. मनीष सिसोदिया यांच्या घरावर छापा टाकला असता काहीही मिळाले नाही.

सिसोदिया यांना 26 फेब्रुवारीला झाली होती अटक

CBIने 8 तासांच्या चौकशीनंतर 26 फेब्रुवारीला सिसोदिया यांना अटक केली होती. त्यांना 27 फेब्रुवारी रोजी न्यायालयात हजर करण्यात आले. न्यायालयाने सिसोदिया यांना 5 दिवसांची CBI कोठडी दिली होती. 28 फेब्रुवारीला सकाळी काँग्रेस नेते आणि ज्येष्ठ वकील अभिषेक मनु सिंघवी यांनी सिसोदिया यांच्या अटकेविरोधात सर्वोच्च न्यायालयात याचिका दाखल केली.

याप्रकरणी तातडीने सुनावणी घेण्याची विनंती त्यांनी न्यायालयाला केली, ती न्यायालयाने मान्य केली. मात्र, 28 फेब्रुवारी रोजी झालेल्या सुनावणीदरम्यान सरन्यायाधीश न्यायमूर्ती डीवाय चंद्रचूड आणि न्यायमूर्ती पीएस नरसिम्हा यांच्या खंडपीठाने याचिका फेटाळून लावली आणि तुम्ही आधी उच्च न्यायालयात जा, असे सांगितले. थेट आमच्याकडे येणे म्हणजे काय? आपण चुकीच्या परंपरेला चालना देऊ शकत नाही.

आतिशी आणि सौरभ दिल्ली सरकारचे नवे मंत्री

दिल्लीचे मुख्यमंत्री अरविंद केजरीवाल यांनी आतिशी मार्लेना आणि सौरभ भारद्वाज यांची नावे एलजींकडे मंजुरीसाठी पाठवली आहेत. आता सिसोदिया आणि जैन यांच्या खात्याची जबाबदारी कैलाश गेहलोत आणि राजकुमार आनंद यांच्याकडे असेल. यासंदर्भात राजपत्रात अधिसूचनाही जारी करण्यात आली आहे. सौरभ भारद्वाज हे केजरीवाल यांच्या 49 दिवसांच्या पहिल्या सरकारमध्ये परिवहन मंत्री होते. आतिशी मार्लेना या शिक्षण क्षेत्रातील सिसोदिया यांच्या सल्लागार होत्या.

CBIला मिळाली होती सिसोदियांची 5 दिवसांची कोठडी

सिसोदिया तपासात सहकार्य करत नसल्याचे CBIने दिल्ली न्यायालयात सांगितले होते. ते प्रत्येक प्रश्नाची उडवाउडवीची उत्तरे देत असल्याने त्यांचा 5 दिवसांचा रिमांड हवा आहे. सिसोदिया यांच्या वकिलाने त्यास विरोध केला. उपमुख्यमंत्र्यांना रिमांडवर पाठवल्याने चुकीचा संदेश जाईल, असा त्यांचा युक्तिवाद होता.