लाहौल आणि चंबामध्ये जोरदार बर्फवृष्टी:लेह-मनाली महामार्गासह अनेक रस्ते बंद, रस्ते निसरडे झाल्याने पर्यटकांना प्रवास न करण्याचा सल्ला

हिमाचल प्रदेशातील लाहौल स्पिती आणि चंबा या आदिवासी जिल्ह्यांमध्ये जोरदार हिमवृष्टी झाली आहे. चंबाच्या पांगी, किलार आणि भरमौरच्या शिखरांवर काल रात्री हिमवर्षाव झाला. यामुळे मनाली-लेह महामार्ग बंद करण्यात आला आहे. तर लाहौल-स्पिती आणि चंबा जिल्ह्यातील भागातील रस्तेही बंद करण्यात आले आहेत.

20 हून अधिक रस्ते बंद
ताज्या बर्फवृष्टीच्या पार्श्वभूमीवर, लाहौल स्पिती पोलिस सर्व पर्यटक आणि स्थानिक लोकांना अनावश्यक प्रवास टाळण्याचा सल्लाही जारी करत आहेत. ताज्या बर्फवृष्टीनंतर रस्ता निसरडा झाल्याने पोलिसांनी लोकांना सावधगिरी बाळगण्याचे आवाहन केले आहे. अशा रस्त्यावरून प्रवास करणे धोक्याचे ठरू शकते. मिळालेल्या माहितीनुसार, चंबा आणि लाहौल स्पितीमध्ये आतापर्यंत 20 हून अधिक रस्ते बंद करण्यात आले आहेत. पीडब्ल्यूडी विभाग हे रस्ते पूर्ववत करण्यात व्यस्त आहे.

अटल बोगद्याजवळ वाहनांची ये-जा थांबली
अटल बोगद्याजवळ बुधवारपासून सलग बर्फवृष्टी होत आहे. त्यामुळे खबरदारीचा उपाय म्हणून वाहनांची वाहतूक बंद करण्यात आली आहे. पट्टण खोऱ्यातही हलकी बर्फवृष्टी सुरू झाली आहे.

राज्यात थंडीचे प्रमाण वाढले
उंच भागात नवीन हिमवृष्टी झाल्यानंतर तापमानातही 3 ते 5 अंश सेल्सिअसची घट झाली आहे. केलॉन्गमध्ये किमान तापमान 2.6 अंश सेल्सिअस आणि कुकुमसेरीमध्ये 2.3 अंश सेल्सिअसपर्यंत घसरले. त्याचप्रमाणे कल्पामध्ये 0, नारकंडा 2.1 , कुफरी 3.6 , डलहौसी 3.3 , मनाली 4.8 आणि शिमलात 7 अंशांवर घसरले आहे.

अनेक भागात रिमझिम पाऊस
काल रात्रीही राज्यातील अनेक भागात हलका पाऊस झाला. पालमपूर येथे सर्वाधिक 10 मिमी, कुकुमसाई येथे 8.2 मिमी आणि कल्पामध्ये 2 मिमी पावसाची नोंद झाली. तसेच इतर अनेक भागात रिमझिम पाऊस झाला आहे.

हिमाचलच्या प्रमुख स्थानकांवर किमान तापमान