वाराणसी:काशी विश्वनाथ कॉरिडॉरचे आज मोदींच्या हस्ते लोकार्पण, रात्रीच्या वेळी वाराणसीत दिसेल दिवाळीसारखे दृश्य

श्री काशी विश्वनाथ धाम कॉरिडॉरचे लाेकार्पण सोमवारी दुपारी १.३७ ते १.५७ या काळात रेवती नक्षत्रातील शुभ मुहूर्तावर होणार आहे. पंतप्रधान नरेंद्र मोदी श्री काशी विश्वनाथ संकुलात गंगा नदीचे पाणी घेऊन पायी येतील. ते सुमारे ४० मिनिटे संकुल परिसरात असतील. धामाचा विकास, विस्तार आणि सौंदर्यीकरणानंतर ५० हजार चौरस मीटर भाग तयार करण्यासाठी सुमारे ८०० कोटी रुपये खर्च झाले आहेत. मंदिराच्या आजूबाजूची दुकाने खरेदी करण्यासाठी ३५० कोटी रुपये खर्च करण्यात आले आहेत.

बाबा विश्वनाथांची पूजा करून पंतप्रधान नरेंद्र मोदी कॉरिडॉरचे लोकार्पण करतील. मंदिर चौकात देशातील २०० प्रमुख संत तसेच २०० विद्वान आणि मान्यवरांना ते संबोधित करतील. संध्याकाळी ते क्रूझने गंगाभ्रमण करून घाटांवरील ११ लाख दिव्यांचे अवलोकन करतील. दशाश्वमेध घाटासमोर थांबून ते गंगा आरतीत सहभागी होतील. त्यांच्यासोबत राज्यपाल आनंदीबेन पटेल यांच्यासह भाजपशासित ११ राज्यांचे मुख्यमंत्री व उपमुख्यमंत्री, केंद्रीय मंत्री आणि भाजपचे ज्येष्ठ नेते हजर राहतील. लोकार्पण कार्यक्रमानंतर बांधकामात सहभागी झालेल्या २३०० मजुरांसोबत पंतप्रधान नरेंद्र मोदी फोटो घेणार आहेत.