बनावट नोटा प्रकरणी एनआयएची 6 ठिकाणी धाड:शस्त्र-बनावट नोटा बनवणारी मशीन जप्त, डी-कंपनीशी संबंध असल्याचे पुरावे

बनावट नोटांप्रकरणी राष्ट्रीय तपास यंत्रणेने (एनआयए) बुधवारी मुंबई आणि ठाण्यात सहा ठिकाणी छापे टाकले. छाप्यात एजन्सीने अनेक शस्त्रे आणि बनावट नोटा बनवण्याची मशीन जप्त केली आहे. एजन्सीचा दावा आहे की अंडरवर्ल्ड डॉन दाऊद इब्राहिम पाकिस्तानमध्ये बसून डी-कंपनीद्वारे बनावट नोटांचा व्यवसाय चालवत आहे.

एनआयएने गुरुवारी एक निवेदन जारी करून सांगितले की, भारतात बनावट नोटांच्या सर्क्युलेशनमध्ये डी कंपनीची महत्त्वाची भूमिका असल्याचे तपासात समोर आले आहे. एजन्सीच्या मुंबई पथकाने बुधवरी डी-कंपनीशी संबंधित अनेक लोकांच्या घरे आणि कार्यालयांसह अनेक मालमत्तांवर छापे टाकले. यादरम्यान अनेक धारदार शस्त्रे, बनावट नोटा बनवण्याची मशीन आणि कागदपत्रे जप्त करण्यात आली आहेत. एजन्सीने सांगितले की छाप्यांमध्ये जप्त केलेल्या पुराव्यांवरून बनावट चलन प्रकरणात डी-कंपनीचा सहभाग असल्याचे सिद्ध झाले.

ठाणे पोलिसांच्या गुन्हे शाखेने नोव्हेंबर 2021 मध्ये 2.98 लाख रुपयांच्या बनावट नोटा जप्त करून या टोळीचा पर्दाफाश केला होता. यामध्ये दोघांना अटक करण्यात आली होती. 18 नोव्हेंबर 2021 रोजी या प्रकरणी महाराष्ट्रातील ठाण्यातील नौपाडा पोलिस ठाण्यात गुन्हा दाखल करण्यात आला होता. रियाझ आणि नसीर अशी त्यांची नावे असून दोघेही मुंबईचे रहिवासी आहेत. ते सध्या न्यायालयीन कोठडीत आहे.

या प्रकरणी ठाणे पोलिसांनी 7 फेब्रुवारी 2023 रोजी आरोपींविरुद्ध आरोपपत्रही दाखल केले होते. त्यानंतर या वर्षी फेब्रुवारीमध्ये संपूर्ण प्रकरण एनआयएकडे वर्ग करण्यात आले. सध्या एजन्सी या प्रकरणाचा तपास करत आहे.

दाऊदचा भाऊ इक्बाल भारतातील काम पाहतो

तपास यंत्रणांनी दिलेल्या माहितीनुसार, दाऊदचा भाऊ इक्बाल कासकर भारतात त्याचे सर्व काम पाहत आहे. तो दाऊदचा उजवा हात छोटा शकीलच्या संपर्कात होता. ठाण्यातील बांधकाम व्यावसायिक सुरेश देवीचंद मेहता यांच्या तक्रारीनंतर इक्बाल तुरुंगात आहे. त्याच्यासोबत त्याचे दोन साथीदार मुमताज शेख आणि इसरार अली यांनाही आधी ठाणे पोलिसांनी आणि नंतर ईडीने अटक केली होती.