काळीज पिळवटून टाकणारी घटना:ओडिशात रुग्णालयाचा रुग्णवाहिका देण्यास नकार, मुलाचा मृतदेह घेऊन 1.5 किमी पायी चालले वडील

ओडिशाचा एक व्हिडिओ सध्या जोरदार व्हायरल होत आहे. यामध्ये वडील आपल्या मुलाचा मृतदेह खांद्यावर घेऊन चालताना दिसत आहेत. सूरधर बेनिया असे या वडिलांचे नाव आहे. मुलगा आजारी होता. बेनिया यांनी त्याला रुग्णालयात नेले, पण तोपर्यंत त्याचा मृत्यू झाला होता. मृतदेह घरी आणायचा होता, मात्र रुग्णवाहिका मिळाली नाही. यानंतर बेनिया यांनी दीड किमी चालत मुलाचा मृतदेह घरी नेला. ही बाब उघडकीस आल्यानंतर आरोग्य विभागाने कारवाई केली आहे. या प्रकरणाची चौकशी करणार असल्याचे विभागाकडून सांगण्यात आले आहे.

6 वर्षांपूर्वी रायगढापासून 100 किमी अंतरावर असलेल्या कालाहांडीमध्ये दाना मांझी प्रकरण उघडकीस आले होते, ज्यामध्ये दाना मांझी आपल्या पत्नीचा मृतदेह घेऊन 13 किमी चालले होते.

ओडिशा टीव्हीच्या वृत्तानुसार, रायगढातील 9 वर्षांचा मुलगा आकाशला बेनिया यांनी उपचारासाठी रुग्णालयात नेले, जिथे डॉक्टरांनी मुलाला तपासून मृत घोषित केले. मुलाच्या मृत्यूनंतर आम्ही मृतदेह घरी नेण्याची विनंती केली, मात्र रुग्णालयाने रुग्णवाहिका नसल्याचे सांगितले, असा आरोप नातेवाइकांनी केला. रुग्णालय व्यवस्थापनाने नकार दिल्यानंतर बेनिया यांनी मुलाचा मृतदेह खांद्यावर घेऊन घराकडे पायीच निघाले.

जिल्हाधिकारी म्हणतात- कारवाई करू...

ही घटना उघडकीस आल्यानंतर रायगढाचे जिल्हाधिकारी सरोज कुमार मिश्रा यांनी कारवाई करण्याचे सांगितले आहे. रायगढा रुग्णालयात महाप्रयाण योजनेंतर्गत मृतदेह नेण्यासाठी तीन वाहनांची सोय असल्याचे मिश्रा यांनी सांगितले. याप्रकरणी आम्ही चौकशी करू, जे कोणी दोषी असतील त्यांच्यावर कारवाई केली जाईल, असेही ते म्हणाले.

यापूर्वीही घडल्या अशा प्रकारच्या घटना

2019 मध्ये, ओडिशाच्या गणपती जिल्ह्यातील मुकुंद डोरा आपल्या मुलीच्या मृत्यूनंतर तिचा मृतदेह खांद्यावर घेऊन पोस्टमॉर्टमसाठी 8 किलोमीटर चालले होते. त्याचा व्हिडिओही चांगलाच व्हायरल झाला होता. याप्रकरणी डॅमेज कंट्रोल करत असताना सरकारने 10 लाखांचा धनादेश डोराला दिला.

दाना मांझी प्रकरणानंतर सरकारने आखली होती एक योजना

24 ऑगस्ट 2016 रोजी ओडिशाच्या कालाहंडी जिल्ह्यातील दाना मांझी प्रकरण चर्चेत आहे. या घटनेनंतर ओडिशा सरकारने महाप्रयाण योजना सुरू केली. या योजनेंतर्गत शासकीय रुग्णालयात उपचारादरम्यान रुग्णांचा मृत्यू झाल्यानंतर त्यांचे मृतदेह शासकीय वाहनातून त्यांच्या घरी पोहोचवले जातात.