हत्येचा खुलासा:पोपटाने उघड केले खुनाचे रहस्य, 9 वर्षानंतर आरोपींना शिक्षा; भाच्याने मामीचा केला होता खून

आग्रा येथे नऊ वर्षांपूर्वी एका महिलेची हत्या आणि दरोडा टाकल्याप्रकरणी दोन दोषींना जन्मठेपेची शिक्षा सुनावण्यात आली. गुन्हेगारांनी महिलेच्या पाळीव कुत्र्यालाही मारले होते. विशेष बाब म्हणजे कुत्र्याच्या हल्ल्यातील जखमेच्या खुणा आणि पोपटाची साक्ष पोलिसांना मारेकऱ्यांपर्यंत घेऊन गेली. महिलेची हत्या करणाऱ्या दोषींपैकी एक हा महिलेचा भाचा आहे.

दागिने आणि रोख रक्कम लुटली
घटना 21 फेब्रुवारी 2014 ची आहे. आग्रा येथील एका वृत्तपत्राचे संपादक विजय शर्मा हे कुटुंबासह लग्न समारंभात सहभागी होण्यासाठी फिरोजाबादला गेले होते. त्यांची पत्नी नीलम एकट्याच घरी होत्या. रात्रीच्या सुमारास चोरट्यांनी घरात घुसून त्यांची हत्या करून दागिने व रोख रक्कम लुटून पळ काढला. त्यानंतर पोलिसांनी अज्ञाताविरुद्ध खुनाचा गुन्हा दाखल केला होता.

विजय शर्मा यांच्या घरात एक पाळीव पोपट असल्याचे कुटुंबीयांनी सांगितले. या घटनेनंतर पोपटाला वाईट वाटू लागले. घरच्यांना संशय आला म्हणून त्यांनी पोपटाच्या समोर अनेकांची नावे घ्यायला सुरुवात केली. विजय शर्मा यांचा भाचा आशुतोष गोस्वामी उर्फ ​​आशू याचे नाव घेताच पोपट जोरात ओरडू लागला. याबाबत त्यांनी पोलिसांना माहिती दिली.

आरोपीच्या अंगावर कुत्र्याच्या चाव्याच्या खुणा
पोलिसांनी आशूला ताब्यात घेऊन चौकशी सुरू केली. तपासात पोलिसांना आशूच्या शरीरावर कुत्र्याच्या चाव्याच्या खुणा आणि जखमा आढळल्या. त्याची कसून चौकशी केली असता त्याने आपला मित्र रॉनी मेस्सीसह नीलम शर्माची हत्या केल्याची कबुली दिली.

नीलम आशुला आपला मुलगा मानत
वकिलाने सांगितले- आशुतोष गोस्वामी ज्यांना नीलम आपला मुलगा मानत होत्या. त्यानेच त्यांना मारले. नीलम यांना एकुलता एक मुलगा होता. तो मानसिकदृष्ट्या विक्षिप्त होता. आरोपी आशुतोषच्या काही चुकीच्या सवयी पाहून त्याला घरी येण्यास मनाई करण्यात आली होती. त्यामुळे तो नाराज होता आणि त्याने नीलम यांची हत्या केली.