पाकिस्तानचे माजी लष्करशहा मुशर्रफ यांचे निधन:दुबईच्या रुग्णालयात सुरू होते उपचार, वयाच्या 79व्या वर्षी घेतला अखेरचा श्वास

पाकिस्तानचे माजी लष्करशहा परवेझ मुशर्रफ यांचे निधन झाले. ते 79 वर्षांचे होते. पाकिस्तानी मीडियाने सूत्रांच्या हवाल्याने हे वृत्त दिले आहे. मुशर्रफ दीर्घकाळ आजारी होते. त्यांच्यावर दुबईतील रुग्णालयात उपचार सुरू होते.

दीर्घकाळापासून अमायलोइडोसिस आजाराने त्रस्त

मुशर्रफ अनेक महिने रुग्णालयात दाखल होते. ट्विटरवर माहिती देताना त्यांच्या कुटुंबीयांनी सांगितले होते की, त्यांना अमायलोइडोसिस नावाच्या आजाराने ग्रासले होते, त्यामुळे त्यांचे सर्व अवयव काम करणे बंद झाले. आता रिकव्हरीला वाव उरलेला नाही.

ब्रिटनच्या नॅशनल हेल्थ सर्व्हिस (NHS) नुसार, अमायलोइडोसिस हा दुर्मिळ आणि गंभीर आजारांचा समूह आहे. यामध्ये मानवी शरीरात अमायलोइड नावाचे असामान्य प्रथिन तयार होऊ लागते. हृदय, मूत्रपिंड, यकृत, मज्जासंस्था, मेंदू इत्यादी अवयवांमध्ये ते जमा होऊ लागते, ज्यामुळे या अवयवांच्या ऊती योग्यरीत्या कार्य करू शकत नाहीत.

मुशर्रफ सैन्यात भरती झाले, 1965 मध्ये भारताशी युद्ध केले, पाकिस्तानात ठरले वीर

महाविद्यालयीन शिक्षण पूर्ण केल्यानंतर वयाच्या 21व्या वर्षी परवेझ मुशर्रफ पाकिस्तानी लष्करात कनिष्ठ अधिकारी म्हणून रुजू झाले. 1965च्या युद्धात ते भारताविरुद्ध लढले. या युद्धात पाकिस्तानचा पराभव झाला. असे असतानाही शौर्याने लढल्याबद्दल मुशर्रफ यांना पाकिस्तान सरकारने पदक दिले होते.

मुशर्रफ यांनी 1971 च्या युद्धातही महत्त्वाची भूमिका बजावली होती. हे पाहून सरकारने त्यांना अनेकवेळा बढती दिली. 1998 मध्ये परवेझ मुशर्रफ जनरल झाले. भारताविरुद्ध कारगिलचा कट त्यांनी रचला. पण सपशेल अपयशी ठरले. जनरल मुशर्रफ यांनी त्यांच्या 'इन द लाइन ऑफ फायर - अ मेमोयर' या चरित्रात कारगिल काबीज करण्याची शपथ घेतल्याचे लिहिले आहे. मात्र, नवाझ शरीफ यांच्यामुळे ते तसे करू शकले नाहीत.

ज्या नवाझ शरीफ यांनी लष्करप्रमुख केले, त्यांनाच सत्तेतून बाहेर फेकले

1998 मध्ये पाकिस्तानचे तत्कालीन पंतप्रधान नवाझ शरीफ यांनी परवेझ मुशर्रफ यांच्यावर विश्वास ठेवला आणि त्यांना पाकिस्तानी लष्कराचे प्रमुख बनवले. पण एक वर्षानंतर 1999 मध्ये जनरल मुशर्रफ यांनी नवाझ शरीफ यांना पदच्युत केले आणि ते पाकिस्तानचे हुकूमशहा बनले. सत्ता हाती घेताच नवाझ शरीफ यांना कुटुंबासह पाकिस्तान सोडावे लागले.

सत्तेत असताना जनरल मुशर्रफ यांनी बलुचिस्तानमध्ये स्वातंत्र्याची मागणी करणाऱ्यांचा वाईट छळ केला. शेकडो लोकांची हत्या झाली. त्यामुळेच सत्तेतून गेल्यानंतर बलुच महिलांनी अमेरिकेकडे जनरल मुशर्रफ यांना जागतिक दहशतवादी घोषित करण्याची मागणी केली होती.

मुशर्रफ कुटुंबीय दिल्लीच्या बंगल्यात राहायचे, आई एएमयूमध्ये शिकली

परवेझ मुशर्रफ यांचे कुटुंब फाळणीपूर्वी भारतात खूप समृद्ध होते. त्यांचे आजोबा कर वसूल करणारे होते. त्यांचे वडीलही ब्रिटिश राजवटीत मोठे अधिकारी होते. मुशर्रफ यांची आई बेगम जरीन यांनी अलीगड मुस्लिम विद्यापीठात शिक्षण घेतले होते. जुन्या दिल्लीत मुशर्रफ कुटुंबाचा मोठा बंगला होता. मुशर्रफ त्यांच्या जन्मानंतर 4 वर्षे येथेच राहिले.

परवेझ मुशर्रफ यांच्या आई बेगम जरीन मुशर्रफ यांनी 2005 मध्ये भारत भेटीदरम्यान लखनऊ, दिल्ली आणि अलीगढ मुस्लिम विद्यापीठाला भेट दिली. जरीन 1940 मध्ये येथे शिकल्या होत्या.