म्हैसूर-चेन्नई वंदे भारत ट्रेनला मोदींनी दाखवला हिरवा झेंडा:लवकरच केम्पेगौडा आंतरराष्ट्रीय विमानतळाच्या टर्मिनल-2चे उद्घाटन करणार

पंतप्रधान नरेंद्र मोदी आजपासून दोन दिवसांच्या दक्षिण भारत दौऱ्यावर आहेत. पंतप्रधान मोदी शुक्रवारी बंगळुरूला पोहोचले. सर्वप्रथम त्यांनी बंगळुरू रेल्वे स्थानकावर म्हैसूर-चेन्नई वंदे भारत ट्रेनला हिरवा झेंडा दाखवला. ही देशातील 5वी आणि दक्षिण भारतातील पहिली वंदे भारत ट्रेन आहे. याशिवाय भारत गौरव काशी दर्शन ट्रेनलाही मोदींनी हिरवा झेंडा दाखवला.

थोड्याच वेळात पंतप्रधान मोदी बंगळुरूमधील केम्पेगौडा आंतरराष्ट्रीय विमानतळाच्या टर्मिनल-2 चे उद्घाटन करतील. मीडिया रिपोर्ट्सनुसार, हे टर्मिनल सुमारे 5,000 कोटी रुपये खर्चून तयार करण्यात आले आहे.

कर्नाटकानंतर पंतप्रधान मोदी तामिळनाडूला जाणार

त्यानंतर पंतप्रधान मोदी तामिळनाडूला जाणार आहेत. तेथे ते दिंडीगुल येथील गांधीग्राम ग्रामीण संस्थेच्या 36व्या दीक्षांत समारंभाला उपस्थित राहणार आहेत. यादरम्यान ते अनेक प्रकल्पांचे उद्घाटन आणि पायाभरणी करणार आहेत.

भेटीपूर्वी पंतप्रधान मोदींनी ट्विट करून आपल्या भेटीची माहिती दिली. त्यांनी लिहिले- मी उद्या 11 नोव्हेंबर रोजी बंगळुरूमध्ये येण्यासाठी उत्सुक आहे. श्रीनादप्रभू केम्पेगौडा यांच्या प्रतिमेचे अनावरण करण्याची संधी मिळाल्याचा मला सन्मान वाटतो.

पंतप्रधानांचा कार्यक्रम

पंतप्रधान मोदी 11 नोव्हेंबर रोजी सकाळी 9:45 वाजता बंगळुरूमधील विधान सौधा येथे संत कवी श्री कनक दास आणि महर्षी वाल्मिकी यांच्या प्रतिमेला पुष्पहार अर्पण करतील. यानंतर, सकाळी 10.20 वाजता, पंतप्रधान बंगळुरू रेल्वे स्थानकावर वंदे भारत एक्सप्रेस आणि भारत गौरव काशी दर्शन ट्रेनला हिरवी झेंडी दाखवतील.

दोन दिवसांपूर्वी पीएम मोदींनी त्यांच्या सोशल मीडियावर बंगळुरू विमानतळाचे काही फोटो शेअर केले आहेत, जे तुम्ही खाली पाहू शकता...

पंतप्रधान मोदींची बंगळुरूत जाहीर सभा

पंतप्रधान सकाळी 11:30 वाजता बंगळुरूमधील केम्पेगौडा आंतरराष्ट्रीय विमानतळाच्या टर्मिनल-2 चे उद्घाटन करतील. त्यानंतर दुपारी 12 वाजता पंतप्रधान नादप्रभू केम्पेगौडा यांच्या 108 फूट ब्राँझ पुतळ्याचे अनावरण करतील. दुपारी साडेबारा वाजता बंगळुरूमध्ये सार्वजनिक कार्यक्रम होणार आहे, त्यामध्ये पंतप्रधान जनतेला संबोधित करतील.