केरळ मुख्यमंत्र्यांविरोधात विमानात घोषणाबाजी:युवक काँग्रेसच्या कार्यकर्त्यांनी दिल्या घोषणा, CPI(M) म्हणाले- हल्ला करण्याचा प्रयत्न

युवक काँग्रेसच्या दोन कार्यकर्त्यांनी केरळचे मुख्यमंत्री पिनाराई विजयन यांच्या विरोधात फ्लाइटमध्ये घोषणाबाजी केली. दोघांनी काळ्या रंगाचा शर्ट परिधान केला होता. विजयन सोमवारी कन्नूरहून तिरुअनंतपुरमला जात होते. युवक काँग्रेसचे प्रदेश उपाध्यक्ष आणि माजी आमदार केएस सबरीनाथन यांनी सोशल मीडियावर तीन सेकंदांचा व्हिडिओ जारी केला, ज्यामध्ये संघटनेचे दोन कार्यकर्ते मुख्यमंत्री विजयन यांच्या राजीनाम्याची मागणी करत घोषणाबाजी करताना दिसत आहेत.

मुख्यमंत्र्यांच्या सोबत असलेल्या एका व्यक्तीने त्यांना धक्काबुक्की केली. फेसबुक पोस्टमध्ये, सबरीनाथन यांनी आरोप केला की हे ज्येष्ठ CPI(M) नेते आणि एलडीएफचे निमंत्रक ईपी जयराजन होते ज्यांनी निदर्शक युवक काँग्रेस कार्यकर्त्यांना धक्काबुक्की केली. युवक काँग्रेसचे कार्यकर्ते विजयन यांच्यावर विमानात हल्ला करण्याचा प्रयत्न करत असल्याचा आरोप एका CPI(M) नेत्याने केला आहे.

विमान तिरुअनंतपुरम विमानतळावर उतरत असताना ही घटना घडली.

सोन्याच्या तस्करी प्रकरणातील मुख्य आरोपी स्वप्ना सुरेश यांनी मुख्यमंत्री आणि त्यांच्या कुटुंबावर आरोप केल्यापासून सीएम विजयन यांना काँग्रेस आणि भाजप कार्यकर्त्यांकडून विरोध होत आहे.