पंजाबच्या मंत्र्यांचा शपथविधी:पहिल्या 5 मंत्र्यांमध्ये 4 दलित आमदारांनी घेतली शपथ, नेत्ररोग तज्ज्ञ बलजित कौर एकमेव महिला मंत्री

पंजाबमध्ये शनिवारी भगवंत मान सरकारचा शपथविधी पार पडला. 10 आमदारांनी मंत्रिपदाची शपथ घेतली. त्यापैकी 8 पहिल्यांदाच मंत्री झाले आहेत. सर्वप्रथम आमदार हरपाल चीमा यांनी मंत्रिपदाची शपथ घेतली. ते मान सरकारचा दलित चेहरा आहेत. यानंतर डॉ. बलजीत कौर यांनी शपथ घेतली. हरभजन सिंग ईटीओ यांनी तिसऱ्या क्रमांकावर शपथ घेतली.

शपथविधीनंतर दुपारी 2 वाजता मान सरकारची पहिली मंत्रिमंडळ बैठक होणार आहे. पंजाब सरकारमध्ये मुख्यमंत्र्यांसह 18 मंत्री असू शकतात. त्यामुळे 7 नवीन मंत्र्यांसाठी मंत्रिमंडळ विस्तार नंतर होणार आहे. मुख्यमंत्री मान यांनी बुधवारी पंजाबच्या मुख्यमंत्रिपदाची शपथ घेतली. हा सोहळा शहीद भगतसिंगांच्या गावी असलेल्या खटकड कलानमध्ये झाला. शपथविधीसाठी आम आदमी पक्षाचे सर्व आमदार कुटुंबासह दाखल झाले होते. मंत्री झालेल्या आमदारांनीही कुटुंबाला सोबत आणले. मुख्यमंत्री भगवंत मान यांचा मुलगा दिलशान मान आणि मुलगी सीरत कौर मान हेदेखील मंत्र्यांच्या शपथविधी सोहळ्याला हजर होते.

सर्वप्रथम हरपाल चीमा यांनी मंत्रिपदाची शपथ घेतली. त्यानंतर डॉ.बलजीत कौर, हरभजन सिंग ईटीओ, डॉ. विजय सिंगला, लालचंद कटारुचक, गुरमीत सिंग मीत हेअर, कुलदीप धालीवाल, लालजीत सिंग भुल्लर, ब्रह्मशंकर झिम्पा आणि शेवटी हरजोत बैंस यांचा समावेश होता.

क्षेत्रानुसार मंत्री

आम आदमी पक्षाने पूर्णपणे माळव्यावर लक्ष केंद्रित केले आहे. येथील मुख्यमंत्री भगवंत मान यांच्याशिवाय दिरबातून हरपाल चीमा, बरनाळामधून मीत हेअर, मानसातून डॉ. विजय सिंगला, मलोतमधून डॉ. बलजीत कौर, श्री आनंदपूर साहिबमधून हरजोत बैंस मंत्री होत आहेत. माझा भागात अजनाळामधून कुलदीप धालीवाल, जंदियालामधून हरभजन सिंग ईटीओ, पट्टीतून लालचंद भुल्लर आणि भोवामधून लालचंद कटारुचक्क यांना मंत्री करण्यात आले आहे. दोआबात ब्रह्मशंकर झिम्पा यांना फक्त होशियारपूरमधून मंत्री करण्यात आले आहे.

जातीय समीकरण

पंजाब सरकारमध्ये आता मुख्यमंत्री मानसह 4 जाट शीख, 3 हिंदू आणि 4 दलित चेहऱ्यांना स्थान देण्यात आले आहे. यामध्ये महिला मंत्री डॉ. बलजीत कौर यांचा समावेश आहे.