राहुल गांधींची आज पुन्हा चौकशी:लंचनंतर पुन्हा ईडी कार्यालयात पोहोचले राहुल, विरोध केल्याप्रकरणी सचिन पायलट यांना अटक

नॅशनल हेराल्ड प्रकरणी चौकशीसाठी बुधवारी सलग तिसऱ्या दिवशी ईडी कार्यालयात पोहोचलेल्या राहुल गांधींची चौकशी सुरू आहे. दुपारच्या जेवणानंतर राहुल पुन्हा दुपारी चारच्या सुमारास ईडीच्या कार्यालयात पोहोचले. मीडिया रिपोर्ट्सनुसार, दुपारच्या जेवणापूर्वी ईडीने त्यांची 3.30 तास चौकशी केली. चौकशीविरोधात काँग्रेस कार्यकर्त्यांचा विरोध सुरूच आहे, दरम्यान, दिल्ली पोलिसांनी आंदोलनात सहभागी असलेले काँग्रेस नेते सचिन पायलट यांना ताब्यात घेतले आहे.

सकाळी राहुल ईडी कार्यालयाकडे निघाले तेव्हा पक्षाचे नेते आणि कार्यकर्ते रस्त्यावर उतरून निदर्शने करत होते. अनेक महिला कार्यकर्त्यांची पोलिसांशी झटापट झाली, पोलिसांनी त्यांना ताब्यात घेतले आहे. त्याचवेळी काँग्रेस कार्यालयात पोलिसांच्या प्रवेशावरून कार्यकर्त्यांनी टायर जाळून संताप व्यक्त केला.

आरोप-प्रत्यारोप सुरु
या संपूर्ण प्रकरणावर दिल्ली पोलिसांनी सांगितले की, काँग्रेसने निदर्शनासाठी परवानगी घेतली नव्हती. कलम 144 लागू करण्यात आल्याची माहिती काँग्रेसने दिल्यानंतरही कार्यकर्त्यांनी गोंधळ घातला. याला प्रत्युत्तर देताना काँग्रेसचे प्रवक्ते रणदीप सुरजेवाला यांनी पोलिसांविरुद्ध एफआयआर नोंदवावा, असे म्हटले आहे. पोलिसांच्या या कारवाईच्या निषेधार्थ काँग्रेस कार्यकर्ते देशव्यापी आंदोलन करणार असल्याचेही त्यांनी सांगितले.

मंगळवारी 4 तासांहून अधिक काळ चौकशी केली

मंगळवारी सलग दुसऱ्या दिवशी चौकशी करण्यात आली. पहिल्या फेरीत ईडीच्या अधिकाऱ्याने राहुल यांची 4 तासांहून अधिक काळ चौकशी केली. त्याचवेळी, जेवणाच्या सुट्टीनंतर सुमारे 6 तास प्रश्नांची प्रक्रिया सुरू राहिली. प्रदीर्घ चौकशीबाबत एजन्सीचे म्हणणे आहे की, राहुल यांचे जबाब नोंदवण्यास अधिक वेळ लागत आहे.

तत्पूर्वी, दुसऱ्या दिवशी राहुल गांधी कारने तपास यंत्रणेच्या कार्यालयात पोहोचले होते. त्यांच्यासोबत बहीण प्रियांका गांधीही होत्या. राहुल यांना सोडल्यानंतर प्रियांका तेथून निघून गेल्या. दोन्ही दिवस काँग्रेस कार्यालयाबाहेर झालेल्या गोंधळामुळे तेथे कलम 144 लागू करण्यात आले आहे.

राहुल यांच्यासोबत पायी चालत निघालेले काँग्रेस नेते रणदीप सिंह सुरजेवाला यांना पोलिसांनी खेचून व्हॅनमध्ये नेले. मोर्चात सहभागी असलेल्या अन्य नेत्यांनाही पोलिसांनी ताब्यात घेतले आहे. आंदोलनादरम्यान त्यांना दुखापत झाल्याचा आरोप सुरजेवाला यांनी केला आहे. पी चिदंबरम यांनाही बरगडीला दुखापत झाली आहे.

CM बघेल यांची पोलिसांशी झटापट, म्हणाले- सीएमला तुम्ही रोखू शकत नाही
छत्तीसगडचे मुख्यमंत्री भूपेश बघेल यांना काँग्रेस कार्यालयाजवळील बॅरिकेडवर अडवल्यानंतर दिल्ली पोलिसांशी झटापट झाली. ते पोलिसांना म्हणाले- तुम्ही मुख्यमंत्र्यांना रोखू शकत नाहीत, पण पोलिसांनी त्यांना जाऊ दिले नाही. तत्पूर्वी, राहुल प्रियांका गांधींसह त्यांच्या घरातून काँग्रेस मुख्यालयात पोहोचले. जिथे काँग्रेसच्या सर्व नेत्यांची बैठक झाली. येथून रणनीती तयार झाल्यानंतर राहुल ईडी कार्यालयाकडे रवाना झाले.

दिल्ली प्रदेशाध्यक्षांचा गदारोळ म्हणाले- मला गोळ्या घाला
बॅरिकेडवर थांबवल्यानंतर दिल्ली काँग्रेसचे प्रदेशाध्यक्ष अनिल चौधरी यांनी गोंधळ घातला. त्यांनी पोलिसांना धक्काबुक्की केली आणि जोरजोरात ओरडू लागले की मला गोळी घाला. पोलिसांनी त्यांना ताब्यात घेऊन व्हॅनमध्ये बसवले असता त्यांनी पोलिस आणि पंतप्रधानांच्या विरोधात जोरदार घोषणाबाजी सुरू केली.

हे नेते ताब्यात
रणदीप सिंह सुरजेवाला, हरीश रावत, केसी वेणुगोपाल, अधीर रंजन चौधरी, गौरव गोगोई, दीपेंद्र सिंह हुडा, रंजीत रंजन, इम्रान प्रतापगढ़ी यांच्यासह अनेक कार्यकर्त्यांना पोलिसांनी अकबर रोडवरून ताब्यात घेतले आहे. त्यांना तुघलक रोड पोलिस ठाण्यात नेण्यात येत आहे. सोमवारी, सुमारे एक हजार काँग्रेस कार्यकर्त्यांना दिल्ली पोलिसांनी ताब्यात घेतले, त्यांना रात्री उशिरा सोडण्यात आले.

ईडीने विचारले- 50 लाख शेअर्ससाठी पैसे कसे उभे केले