लोकसभा निवडणुकीपूर्वी RSSची आजपासून बैठक:सरसंघचालक मोहन भागवत, BJP अध्यक्ष जेपी नड्डांसह प्रमुख दाखल, मोठे निर्णय होण्याची शक्यता

राष्ट्रीय स्वयंसेवक संघाच्या (RSS) अखिल भारतीय प्रतिनिधी सभेची अत्यंत महत्त्वाची बैठक आजपासून हरियाणामध्ये सुरू होत आहे. 12 ते 14 मार्च दरम्यान चालणारी ही तीन दिवसीय बैठक पानिपतच्या समालखा भागात होणार आहे. 2024 च्या लोकसभा निवडणुकीपूर्वी आरएसएसच्या प्रमुख नेत्यांची ही शेवटची बैठक आहे. त्यादृष्टीने संघ आणि भाजप यांच्यात समन्वयक म्हणून काम करणारे काही चेहरे बदलले जाण्याची शक्यता वर्तविली जात आहे. याशिवाय RSS मधील काही लोकांच्या जबाबदाऱ्या बदलण्याचा निर्णयही यात घेतला जाऊ शकतो.

सरसंघचालक डॉ. मोहन भागवत चार दिवसांपूर्वीच समलखा येथे पोहोचले आहेत. यावरून या बैठकीचे महत्त्व आपणास समजते. गेल्या 4 दिवसांपासून ते समालखा भागातील पट्टिकल्याण गावात ज्या ठिकाणी या बैठकीसाठी खास बनवलेल्या केंद्रात आहेत. या ठिकाणी संघाच्या प्रमुख चेहऱ्यांशी विचारविमर्श सुरू आहे.

अखिल भारतीय प्रतिनिधी सभेच्या (ABPS) या वार्षिक सभेला देशभरातील 1400 संघ स्वयंसेवक सहभागी होणार आहे या सरसंघचालकांमध्ये डॉ. मोहन भागवत आणि सरकार्यवाह दत्तात्रेय होसबळे यांच्यासह सर्व सहकारी सरकार्यवाह, RSS अखिल भारतीय कार्यकारिणी, प्रादेशिक आणि प्रांतीय कार्यकारिणी, संघाचे निवडून आलेले प्रतिनिधी आणि सर्व विभाग प्रचारक तसेच संघाच्या 34 विविध संघटनांमधील निवडक निमंत्रितांचा समावेश असेल. संघाचे अखिल भारतीय प्रचार प्रमुख सुनील आंबेकर यांनी सांगितले की, सहसरकार्यवाह डॉ. मनमोहन वैद्य रविवारी सकाळी 9.15 वाजता बैठकीपूर्वी पत्रकारांशी संवाद साधणार आहेत.

पुढील कामकाजावर व वर्षभराच्या नियोजनावर चर्चा
सरसंघचालक मोहन भागवत हरियाणात 10 दिवसांच्या मुक्कामावर असून या 3 दिवसांच्या बैठकीची संपूर्ँण रुपरेषा 4 दिवस अगोदर ठरवण्यात आली. आरएसएसचे अखिल भारतीय सह-प्रचार प्रमुख नरेंद्र यांनी सांगितले की, या अत्यंत महत्त्वाच्या बैठकीत 12 मार्च रोजी उद्घाटन सत्रानंतर 14 मार्चपर्यंत सतत चर्चा सुरू राहील. यादरम्यान संघाच्या 2022-2023 या वर्षातील कामकाजाचा आढावा घेण्यासोबतच पुढील वर्षाच्या म्हणजे 2023-2024 च्या कार्य आराखड्यावरही चर्चा केली जाईल.

आरएसएस स्थापनेला 2025 मध्ये शंभर वर्ष पूर्ण होणार
2025 मध्ये आरएसएसच्या स्थापनेला 100 वर्षे पूर्ण होत आहेत. राष्ट्रीय स्वयंसेवक संघाचे अखिल भारतीय प्रचार प्रमुख सुनील आंबेकर म्हणाले की, शताब्दी वर्षावर प्रतिनिधी सभेत विशेष चर्चा होणार आहे. सन 2025 पर्यंत नवीन लोकांना RSS शी जोडण्याचे लक्ष्य समोर ठेवून 2023-24 या वर्षासाठी कार्य योजना तयार करण्यावर चर्चा होणार आहे.

महर्षी दयानंद यांच्या 200 व्या जयंतीच्या अनुषंगाने कार्यक्रम
2024 हे वर्ष महर्षी दयानंद यांची 200 वी जयंती आहे. भगवान महावीर स्वामींचे 2550 वे निर्वाण वर्षही येत आहे. या बैठकीत या दोघांवर विशेष निवेदन जारी करण्यात येणार आहे. स्वयंसेवकांची भरती आणि प्रशिक्षण याशिवाय संघाचे शिक्षण क्षेत्र, शताब्दीचा विस्तार तसेच देशातील सद्यस्थिती यावर चर्चा होणार आहे. बैठकीत महत्त्वाच्या विषयांवरील प्रस्तावही मंजूर केले जाणार आहेत.

संघ शाखा हा संघटनेचा प्रमुख कणा
शाखा हा संघाचा कणा असून शाखा समाज परिवर्तनाचे केंद्र असल्याचे सुनील आंबेकर म्हणाले. शाखा दरम्यान, स्वयंसेवक बदलत्या सामाजिक परिस्थितीचा अभ्यास करतात. विषय निवडतात. समाजाला स्वावलंबी बनवण्यासाठी, समाजात सामाजिक सलोखा राखण्यासाठी, पर्यावरणाचे रक्षण करण्यासाठी आणि अमृतकाल अंतर्गत देशात कोणती कामे झाली पाहिजेत, ही सर्व कामे स्वयंसेवक शाखांच्या माध्यमातूनच चालवली जातात.

हरियाणात 12 वर्षांनंतर एवढी बैठक
RSS च्या अखिल भारतीय प्रतिनिधी सभेची बैठक 12 वर्षांनंतर हरियाणात होत आहे. पुढील वर्षी हरियाणात विधानसभा निवडणुका आहेत. सन 2014 मध्ये, हरियाणामध्ये पूर्ण बहुमताने सरकार स्थापन करणाऱ्या भाजपला 2019 च्या निवडणुकीत बहुमताच्या जागा जिंकता आल्या नाहीत. सरकार स्थापन करण्यासाठी त्यांना जननायक जनता पार्टी (JJP) सारख्या नवीन पक्षाचा पाठिंबा घ्यावा लागला. 2019 मध्येच अस्तित्वात आलेली जेजेपीची ती पहिलीच निवडणूक होती. 2019 पासून हरियाणामध्ये भाजपची लोकप्रियता कमी होताना दिसत आहे.