बिल्किस बानो प्रकरणी सुप्रीम कोर्टात आज सुनावणी:मागच्या वेळी SC ने सरकारला विचारले होते- बिल्किस प्रकरणातील दोषींना का सोडले?

बिल्किस बानो प्रकरणी आज दुपारी 2 वाजता सुप्रीम कोर्टात सुनावणी होणार आहे. याप्रकरणी 18 एप्रिल रोजी शेवटची सुनावणी झाली होती. यादरम्यान न्यायमूर्ती केएम जोसेफ आणि बीव्ही नागरत्ना यांच्या खंडपीठाने सरकारला दोषींच्या सुटकेचे कारण विचारले होते. कोर्टाने म्हटलं होतं- आज हे बिल्किस बानो यांच्यासोबत घडले आहे, उद्या तुमच्या आणि आमच्या बाबतीतही घडू शकते.

11 दोषींच्या सुटकेला आव्हान
बिल्किस यांनी याचिकेत गुजरात सरकारवर खटल्यातील दोषींना मुदतीपूर्वी सोडल्याचा आरोप केला आहे. त्यांनी 11 दोषींच्या सुटकेच्या निर्णयाला सर्वोच्च न्यायालयात आव्हान दिले आहे.

याचिकेवर सुनावणी करताना न्यायालयाने केंद्र आणि गुजरात सरकारला दोषींच्या मुदतपूर्व सुटकेशी संबंधित फाइल्स सादर करण्यास सांगितले. जर तुम्ही दोषींना सोडण्याचे कारण सांगितले नाही तर आम्ही आमचाच निष्कर्ष काढू, असे न्यायालयाने म्हटले होते.

सुप्रीम कोर्टाने विचारले - दोषींना सोडून तुम्ही काय संदेश देत आहात?
सुप्रीम कोर्टाने सांगितले की, हे असे प्रकरण आहे ज्यामध्ये गर्भवती महिलेवर सामूहिक बलात्कार करण्यात आला आणि तिच्या सात नातेवाईकांची हत्या करण्यात आली. तुम्ही सफरचंदाची तुलना संत्र्याशी कशी करू शकता? एका व्यक्तीच्या हत्येची तुलना सामूहिक हत्याकांडाशी कशी करता येईल? हा समाज आणि समाजाविरुद्ध गुन्हा आहे. आम्हाला असे वाटते की, तुम्ही तुमची शक्ती आणि विवेकाचा उपयोग जनतेच्या भल्यासाठी केला पाहिजे. दोषींना सोडून तुम्ही काय संदेश देत आहात?

15 ऑगस्ट रोजी दोषींची सुटका करण्यात आली होती
2002 च्या गोध्रा कांडात बिल्किस बानोवर बलात्कार झाला आणि तिच्या कुटुंबियांची हत्या करण्यात आली. या प्रकरणी 11 जणांना दोषी ठरवण्यात आले होते. गेल्या वर्षी 15 ऑगस्ट रोजी गुजरात सरकारने सर्व दोषींची तुरुंगातून सुटका केली होती.

यानंतर बिल्किस बानो यांनी 30 नोव्हेंबर 2022 रोजी सर्वोच्च न्यायालयाचा दरवाजा ठोठावत याविरोधात याचिका दाखल केली. याशिवाय सामाजिक कार्यकर्त्या सुभाषिनी अली आणि टीएमसी खासदार महुआ मोईत्रा यांनी या प्रकरणातील ११ दोषींना सोडण्याचा गुजरात सरकारचा आदेश रद्द करण्याची मागणी केली.

बिल्किस यांनी दोन याचिका दाखल केल्या होत्या
बिल्किस बानो यांनी 30 नोव्हेंबर रोजी सर्वोच्च न्यायालयात दोन याचिका दाखल केल्या होत्या. पहिल्या याचिकेत 11 दोषींच्या सुटकेला आव्हान देत त्यांना त्वरित तुरुंगात पाठवण्याची मागणी केली होती. त्याचवेळी, दुसऱ्या याचिकेत मे महिन्यात दिलेल्या न्यायालयाच्या आदेशाचा पुनर्विचार करण्याची मागणी करण्यात आली होती, ज्यामध्ये न्यायालयाने म्हटले होते की, दोषींच्या सुटकेचा निर्णय गुजरात सरकार घेईल. यावर बिल्किस म्हणाल्या की, महाराष्ट्रात खटला सुरू असताना गुजरात सरकार निर्णय कसा घेणार?

गोध्रा नंतरच्या दंगलीत बिल्किसवर सामूहिक बलात्कार
गोध्रा हत्याकांडानंतर 3 मार्च 2002 रोजी गुजरातमध्ये दंगली उसळल्या. दंगलीदरम्यान दाहोद जिल्ह्यातील लिमखेडा तालुक्यातील रंधिकपूर गावात संतप्त जमावाने बिल्किस बानोच्या घरात घुसून घुसखोरी केली. दंगलखोरांपासून वाचण्यासाठी बिल्किस कुटुंबासह शेतात लपली. तेव्हा बिल्किस 21 वर्षांची होती आणि ती 5 महिन्यांची गर्भवती होती.

दंगलखोरांनी बिल्किसवर सामूहिक बलात्कार केला. आई आणि आणखी तीन महिलांवरही बलात्कार झाला. यादरम्यान हल्लेखोरांनी बिल्किसच्या कुटुंबातील 17 पैकी 7 जणांची हत्या केली. त्याच वेळी, 6 लोक बेपत्ता झाले, ज्यांचा शोध लागला नाही. या हल्ल्यातून फक्त बिल्कीस, एक पुरुष आणि एक तीन वर्षांचा मुलगा बचावला.