मांडस चक्रीवादळाचा धोका वाढला:तामिळनाडूतील 13 जिल्ह्यांमध्ये आज रेड अलर्ट जारी; चेन्नईत उद्याने, क्रीडांगणे बंद

मांडस चक्रीवादळ आज तीव्र होण्याची शक्यता आहे. या दरम्यान 105 किमी प्रतितास वेगाने वारे वाहू शकतात. त्यामुळे आज तामिळनाडूतील 13 जिल्ह्यांमध्ये रेड अलर्ट जारी करण्यात आला आहे. खबरदारीचा उपाय म्हणून एनडीआरएफच्या सहा तुकड्या तैनात करण्यात आल्या आहेत. ग्रेटर चेन्नई कॉर्पोरेशनने पुढील सूचना मिळेपर्यंत सर्व उद्याने आणि क्रीडांगणे बंद ठेवण्याचे आदेश दिले आहेत. याशिवाय लोकांना शुक्रवार आणि शनिवारी समुद्रकिनाऱ्यावर न जाण्यास सांगण्यात आले आहे.

तामिळनाडूतील या जिल्ह्यांमध्ये पाऊस
हवामान खात्यानुसार, पुढील तीन तासांत तमिळनाडूतील तिरुवल्लूर, चेन्नई, चेंगलपट्टू आणि कांचीपुरम जिल्ह्यांत काही ठिकाणी मुसळधार पावसाची शक्यता आहे. याशिवाय रानीपेट्टाई, वेल्लोर, तिरुपत्तूर, कृष्णगिरी, धर्मपुरी, तिरुवन्नमलाई, कल्लाकुरीची, अरियालूर, पेरांबलूर, तिरुचिरापल्ली, करूर, इरोड, सेलम येथे हलका ते मध्यम पाऊस पडण्याची शक्यता आहे.

पुद्दुचेरी- कराईकलमध्ये सर्व शाळा आणि महाविद्यालये बंद
ग्रेटर चेन्नई कॉर्पोरेशनच्या आयुक्तांनी मांडस चक्रीवादळाच्या धोक्याबाबत अधिकाऱ्यांशी चर्चा केली. तसेच, त्यांनी लोकांना त्यांच्या गाड्या झाडांखाली न ठेवता मोकळ्या जागेत पार्क करण्यास सांगितले आहे. मांडसच्या पार्श्वभूमीवर पुद्दुचेरी आणि कराईकलमधील सर्व शाळा आणि महाविद्यालये शुक्रवारी बंद राहतील, असे शिक्षण मंत्री ए नमाशिवम यांनी सांगितले.

भारतीय हवामानशास्त्र विभाग (IMD) च्या मते, वादळ 9 डिसेंबरच्या रात्री उत्तर तामिळनाडू, पुद्दुचेरी आणि लगतच्या दक्षिण आंध्र प्रदेशच्या पुद्दुचेरी आणि श्रीहरीकोटा दरम्यान 65-75 किमी प्रतितास वेगाने पश्चिम-वायव्य दिशेने सरकत आहे. तत्पूर्वी, आयएमडीने सांगितले होते की, मांडस शुक्रवारी सकाळपर्यंत तीव्र होण्याची शक्यता आहे. त्यानंतर हे वादळ हळूहळू कमकुवत होण्याची शक्यता आहे.

समुद्रकिनाऱ्यावरील सर्व दुकाने बंद
चक्रीवादळाच्या इशाऱ्यामुळे समुद्रकिनाऱ्यालगतची सर्व दुकाने बंद ठेवण्यात आली होती, तर सुरक्षेसाठी मासेमारीच्या नौका समुद्रकिनाऱ्यापासून दूर ठेवण्यात आल्या होत्या. आपत्कालीन स्थितीसाठी समुद्रकिनाऱ्यावर रुग्णवाहिकाही तैनात करण्यात आल्या आहेत. मांडस चक्रीवादळ गेल्या 6 तासात 13 किमी प्रतितास वेगाने जवळपास पश्चिम-वायव्य दिशेने सरकले, त्यानंतर ते वादळात तीव्र झाले.

लोकांना सतत अपडेट केले जात आहे
चक्रीवादळाच्या धोक्याच्या पार्श्वभूमीवर भारतीय तटरक्षक दलाने अनेक उपाययोजना सुरू केल्या आहेत. एका अधिकाऱ्याने सांगितले की, राज्य प्रशासनाने समुद्रकिनारी राहणाऱ्या लोकांसाठी अलर्ट जारी केला आहे. याशिवाय राज्य आपत्ती व्यवस्थापन प्राधिकरणांकडून स्थानिक प्रिंट, दूरदर्शन आणि इलेक्ट्रॉनिक माध्यमांद्वारे लोकांना सतत अपडेट केले जात आहे.