तापमान:दोन दिवस महाराष्ट्रासह देशभरात उष्णतेची लाट, 47 अंशांसह राजस्थानातील बांसवाडा जगात सर्वात उष्ण

देशातील बहुतांश भागांत पुढील दोन दिवसांत तापमान वाढेल. शुक्रवारी हवामान खात्याने सांगितले की, आर्द्रता आणि तीव्र उष्णतेमुळे अाेडिशा, राजस्थान, मध्य प्रदेश, छत्तीसगड, केरळ आणि तामिळनाडूत १३-१४ मेपर्यंत काहिली राहील. शुक्रवारी राजस्थानातील बांसवाडा जगातील सर्वात उष्ण भाग होता.

येथे ४७ अंश तापमानाची नोंद झाली. बिकानेर, चुरू, जैसलमेरसह राज्यातील ८ जिल्ह्यांत पारा ४५ अंशांपार होता. शुक्रवारपासून गुजरात, महाराष्ट्र, बिहार व पश्चिम बंगालच्या काही भागांत उष्णतेच्या लाटेची शक्यता आहे. राजस्थानात १३ मे व आंध्रच्या काही भागांत ४ दिवसांसाठी १६ मेपर्यंत तीव्र उष्णतेचा प्रकोप जाणवणार आहे.

भुसावळात ४५.७ सेल्सियस

भुसावळमध्ये शुक्रवारी यंदाच्या सर्वाधिक ४५.७ अंश तापमानाची नोंद केंद्रीय जल आयोगाने केली. नंदुरबारला ४४ व धुळ्यात ४३ तापमान होते. आयएमडीनुसार जळगावात ४४.९ अंश तापमान नोंद झाले. छत्रपती संभाजीनगरात पारा ४१.४ अंशांवर पोहोचला.