300 सिनेमांत झळकलेल्या या अभिनेत्याला आता पडलीये एका वेळच्या जेवणाची भ्रांत

एन्टरटेन्मेंट डेस्कः 300हून अधिक सिनेमांत झळकलेले अभिनेते सतीश कौल यांनी आपल्या करिअरमध्ये दिलीप कुमार, देव आनंद, अमिताभ बच्चन आणि शाहरुख खानसह अनेक अभिनेत्यांसोबत काम केले आहे. मात्र हा अभिनेता आता अज्ञातवासात जीवन व्यतीत करत आहे. पडद्याआड गुडूप झालाय. त्यांचा गेल्यावर्षी हॉस्पिटलमध्ये दाखल असतानाचा एक फोटो सोशल मीडियावर वायरल होताना दिसतोय.

2014 मध्ये बाथरुममध्ये पडल्यानंतर त्यांना रुग्णालयात दाखल करण्यात आले होते. मात्र बरे होऊनदेखील त्यांना रुग्णालयातच दिवस काढावे लागले होते. त्याचे कारण म्हणजे रुग्णालयाच्या बाहेर त्यांच्याकडे राहायला जागा नव्हती.

बीबीसीला दिलेल्या मुलाखतीत त्यांनी सांगितले, ''पूर्वी एका खासगी रुग्णालयात उपचार घेत होतो. मात्र उपचारांसाठी पैसे नसल्याने मला पटियालातील एका छोट्या रुग्णालयात दाखल करण्यात आले.''

200 हून अधिक पंजाबी आणि सुमारे 100 हिंदी सिनेमांत त्यांनी महत्त्वाच्या भूमिका साकारल्या. 30 वर्षांपूर्वी अभिनेत्री नुतन यांच्यासोबत 'कर्मा' या सिनेमात सतीश यांनी त्यांच्या मुलाची भूमिका वठवली होती.