आपल्या शहरातील ताज्या बातम्या आणि ई-पेपर मिळवा मोफत

Install App

ADS Free बातम्या वाचण्यासाठी आताच इंस्टॉल करा दिव्य मराठी अ‍ॅप

महाराष्ट्र म्हणजे भारताला समृध्दतेकडे नेणारी भूमी - अभिनेता मुकेश तिवारी

7 वर्षांपूर्वी
  • कॉपी लिंक
पुणे - साहित्य-संस्कृती-देशभक्ती अशा सर्वच पातळीवर महाराष्ट्र म्हणजे भारताला मिळालेली एक अमुल्य देणगी आहे, जी भारताला समृद्धतेकडे नेत राहील असे प्रतिपादन प्रसिध्द अभिनेता मुकेश तिवारी यांनी केले. अॅड. उज्ज्वल निकम ही देखील महाराष्ट्रानेच भारताला दिलेली एक देणगीच आहे आणि त्यांच्या जीवनावर आधारित मराठी चित्रपटात मला काम करण्याची संधी मिळाली हे माझे भाग्य आहे असेही त्यांनी यावेळी पत्रकारांशी बोलताना सांगितले.
'आदेश - पॉवर ऑफ लॉ' या मराठी सिनेमाच्या चित्रीकरणासाठी तिवारी पुण्यात आले होते त्यावेळी ते बोलत होते. हा सिनेमा मराठीत असला तरी नंतर तो तमिळ, तेलगु आणि बंगाली भाषेत डब करून प्रदर्शित केला जाणार आहे असे यावेळी लेखक आणि निर्माते संविधान आंग्रे यांनी सांगितले .
मुकेश तिवारी यावेळी बोलताना पुढे म्हणाले, ''महाराष्ट्राला संतांची भूमी आहे असे म्हटले जाते. येथेच साहित्य आणि संस्कृती या परंपरेचा मूळ स्त्रोत आहे. भारतात कुठे ही नाही अशी येथे चित्रपट आणि नाटक याबाबतची धोरणे राबविली जातात. हिंदी सिनेमाची देखील महाराष्ट्र हीच कर्मभूमी आहे. जुने चित्रपट, नाटक, संगीत येथे कधी ही कालबाह्य होत नाही. कितीही खडतर अवस्था आली तरी त्यामुळे येथील रंगभूमी जिवंतच राहील. फायदा-तोटा याचा विचार न करता चित्रपट-नाटक आणि रंगभूमी वेगाने पुढे जाते आहे येथील रसिकताच त्याला कारणीभूत आहे प्रशिक्षण घेवूनच अभिनय करावा किंवा या सृष्टीत उतरावे असे काही नाही, इच्छाशक्ती मनापासून आहे तो येथे आज न उद्या यश प्रस्थापित करतोच करतो. नाना पाटेकर-कमल हसन ही उदाहरणे यासाठी देता येतील. आज सिनेमा क्षेत्रात ही चांगले परिवर्तन मला जाणवते आहे.''
भोजपुरी सिनेमांवर मात्र यावेळी मुकेश तिवारी यांनी टीका केली. केवळ आयटम साँगसाठी पेट्रोल पंप विकून सिनेमा काढणारी प्रवृत्ती किती दिवस तग धरेल असे ते म्हणाले.
ते पुढे म्हणाले, 1993 पासून शासनाचे विशेष सरकारी वकील म्हणून कामकाज पाहणाऱ्या उज्व्वल निकम यांनी दहशतवाद्यांविरुद्ध सन 1993 चा मुंबई बॉम्बस्फोट खटला, कल्याण लोकल रेल्वे बॉम्ब स्फोट खटला, गेट वे ऑफ इंडिया, झवेरी बाजार बॉम्ब स्फोट खटला, हॉटेल ताज, ओबेरॉय येथे झालेला दहशतवादी हल्ल्याचा पाक अतिरेकी अजमल कसाबचा खटला, वेगवेगळे संवेदनशील खटले अतिशय कर्तव्यदक्षपणे हाताळून भारतीय कायद्याचे आणि भारताचे रक्षण करण्याचेच काम केले आहे. अॅड. निकम यांनी आतापर्यंत चालविलेल्या विविध खटल्यात एकूण 628 कुख्यात आरोपींना आजन्म कारावासाची शिक्षा तर 37 गुन्हेगारांना मृत्यू दंडाची शिक्षा झालेली आहे. अॅड. निकम यांनी यापूर्वी देखील एक डिसेंबर 10ला संयुक्त राष्ट्र संघाच्या सुरक्षा बैठकीत "दहशतवाद' या विषयावर भारत सरकारचे प्रतिनिधित्व केले आहे. त्यांना डॉ. डी. वाय पाटील विद्यापीठातर्फे (पुणे) माजी राष्ट्रपती डॉ. अब्दुल कलाम यांच्या हस्ते कायदा क्षेत्रात उत्कृष्ट कामगिरी केल्याबद्दल डॉक्‍टरेट ही पदवी नुकतीच बहाल करण्यात आली आहे. तसेच त्यांना वेगवेगळ्या संघटनांमार्फत आतापर्यंत एकूण 65 पुरस्कार प्राप्त झाले आहेत.
सह निर्माता दिनेश पुजारी, योगेश वणवे यांनी सांगितले, की संविधान आंग्रे यांनी या चित्रपटाच्या निर्मितीसाठी काही वर्षे मेहनत घेतली. अशा प्रकारे सरकारी वकिलाच्या जीवनावर येणारा हा पहिलाच चित्रपट आहे. दिवाळीपर्यंत तो प्रदर्शित करण्याचा आमचा प्रयत्न आहे. काही मोजक्या खटल्यांचा यात समावेश करण्यात आला असून अवास्तववादाला टाळून तो करण्यात येतो आहे. त्यामुळे अॅक्शन-थ्रिलर यांचा अतिवापर येथे नसेल. मात्र केसेसच्या कथानाकाप्रमाणे एक आयटम साँग आणि अन्य दोन गाणी यात असतील ती अजून चित्रित व्हायची आहेत. अशोक शिंदे, अनंत जोग, मिथिला नाईक, हेमंत वनारसे यांच्या यात भूमिका आहेत. दिग्दर्शक संविधान आंग्रे हे स्वतः उज्ज्वल निकम यांची भूमिका साकारत आहेत.
पुढील स्लाईड्समध्ये पाहा चित्रीकरणादरम्यान क्लिक झालेली मुकेश तिवारी यांची छायाचित्रे...