अमूलचा विदर्भात 400 कोटींचा प्रकल्प; नितीन गडकरी यांची माहिती

नवी दिल्ली- दुष्काळ आणि शेतकरी आत्महत्यांमुळे चर्चेत असलेल्या विदर्भात अमूल समूहातर्फे ४०० कोटींचा डेअरी प्रकल्प उभारला जाईल, अशी माहिती केंद्रीय मंत्री नितीन गडकरी यांनी दिली आहे.

"कर्जाच्या जाळ्यातून शेतकऱ्यांची मुक्ती' या विषयावर आयोजित एका कार्यशाळेत ते बोलत होते. नुकताच त्यांनी गुजरात दौरा केला. त्या वेळी त्यांनी गुजरात कोऑपरेटिव्ह मिल्क मार्केटिंग फेडरेशन आणि अमूल कंपनीशी चर्चा केली. अमूल विदर्भातील सद्य:स्थिती सुधारण्याच्या उद्देशाने केंद्र सरकारने अमूल समूहाकडे काही योजना आणण्याचा आग्रह धरला होता. याच पार्श्वभूमीवर अमूलने ४०० कोटींच्या प्रकल्पासाठी इच्छा दर्शवली असल्याचे गडकरी म्हणाले. ते पुढे म्हणाले, अमूलने नुकताच खानदेशातील जळगावमध्ये डेअरी प्रकल्प सुरू केला आहे. या प्रकल्पाअंतर्गंत अमूल लोकांकडून दूध खरेदी करेल आणि नंतर त्यावर प्रक्रिया केली जाईल. दरांच्या बाबतीत अमूल सध्या आघाडीवर आहे. पुढील वर्षांत रोज ३८ दशलक्ष लिटरपेक्षा अधिक दुधावर प्रक्रिया करून उत्पादने तयार करण्याच्या उद्देशाने अमूल अडीच हजार कोटी रुपयांची गुंतवणूक करण्याच्या तयारीत आहे. दूध डेअरीच्या या प्रकल्पाव्यतिरिक्त मधमाशी पालन, शेळीपालनसारखे काही प्रकल्प मोठ्या स्तरावर राबवण्याचा निर्धार असल्याचेही गडकरी यांनी या वेळी सांगितले.