दुसरा कार्यकाळ स्वीकारण्यास RBIचे गव्हर्नर रघुराम राजन यांचा नकार

राजन यांना गव्हर्नरपदाचा दुसरा कार्यकाळ मिळणार की नाही, याबाबत गेल्या काही दिवसांपासून जोरदार चर्चा रंगली होती. भाजप खासदार सुब्रमण्यम स्वामी यांनी राजन यांच्या धोरणांवर सातत्याने हल्ले चढवले होते. व्याजदराबाबतच्या राजन यांच्या सक्तीच्या धोरणांमुळे अर्थव्यवस्थेचे नुकसान झाले, अशी टीका स्वामी यांनी केली होती. राजन यांच्याकडे अमेरिकी ग्रीन कार्ड असल्यामुळे त्यांची वैचारिक बैठक पूर्णत: भारतीय नसल्याचा आरोपही स्वामींनी केला होता. स्वामी यांच्याकडून राजन यांच्यावर जाहिरपणे टिकास्त्र सोडले जात असतानाच केंद्रीय अर्थमंत्री अरूण जेटली यांनी सार्वजनिक टीका करता संयम बाळगण्याचे आवाहन केले होते. तर राज्यसभेवर नुकतेच नामनिर्देशित झालेल्या खासदारांची टिप्पणी त्यांचे वैयक्तिक मत असल्याचे भाजप अध्यक्ष अमित शहा यांनी म्हटले होते. राजन यांनी सप्टेंबरमध्ये कार्यकाळ समाप्तीनंतर आरबीआय सोडण्याचा निर्णय घेतल्यामुळे मी प्रचंड व्यथित आहे. मात्र त्यांच्या या निर्णयाने आपल्याला अजिबात आश्चर्य वाटले नाही, असे माजी अर्थमंत्री पी. चिदंबरम यांनी म्हटले आहे. चिदंबरम यांच्या काळातच राजन यांची नियुक्ती झाली होती.