पंधरा मिनिटांत उत्तर न दिल्यास चेक बाउन्स

जर तुम्ही चेकबुकचा वापर करत असाल, तर ही माहिती तुमच्यासाठीच आहे. रिझर्व्ह बँकेने आता काही नियमांत बदल केले आहेत. या बदलाकडे कानाडोळा करणा-यांना मोठे नुकसान सहन करावे लागणार आहे. प्रत्यक्षात आरबीआयने चेक वटवताना होणा-या धोकेबाजीला आळा घालण्याच्या दृष्टीने काही स्पष्ट सूचना दिल्या आहेत.
आरबीआयच्या मते, 5 लाख किंवा त्याहून अधिक रकमेचे चेक क्लिअरिंगसाठी आल्यास बँकांना खास करून बजावण्यात आले आहे. त्यांना असे सांगण्यात आले आहे, पाच लाख किंवा त्याहून अधिक रकमेचे चेक क्लिअरिंगसाठी आल्यास चेक देणा-याची योग्य खातरजमा करून घ्या. पूर्ण समाधान किंवा खात्री पटल्यानंतरच चेक वटण्यास मंजुरी द्या, अशी सावधगिरी बाळगली तरच कोणत्याही प्रकारच्या बनवेगिरीला आळा घालता येईल.
आरबीआयच्या अधिका-यांचे म्हणणे आहे की, चेक क्लिअरिंग देताना देणा-या पार्टी, कंपनी अथवा व्यक्तीशी फोनवर संपर्क साधा. चेकसंदर्भात पूर्ण माहिती घ्या. बँकेत यासाठी वेळ लागत असेल तर एसएमएस अ‍ॅलर्ट योजना सुरू करा. पंधरा मिनिटांत उत्तर न आल्यास चेक वटवू नका.