भारतीय कंपन्यांची विदेशात 29.3 अब्ज डॉलरची गुंतवणूक

मुंबई - चालू आर्थिक वर्षाच्या जानेवारी महिन्यापर्यंत भारतीय कंपन्यांच्या देशाबाहेरील थेट परकीय गुंतवणुकीत काही प्रमाणात सुधारणा दिसून आली आहे. या कंपन्यांच्या परकीय संपत्तीच्या अधिग्रहणावर 29.34 अब्ज डॉलरचा व्यवहार झाला असल्याचे एका अहवालात दिसून आले आहे. गेल्या दोन आर्थिक वर्षांत विदेशात भारतीय कंपन्यांची थेट परकीय गुंतवणूक कमी राहिली होती.

‘केअर रेटिंग्ज’च्या अहवालानुसार 2006-07 ते 2010-11 या काळात बाहेरील विदेशी गुंतवणुकीत तेजीने वाढ झाली आहे. मात्र, त्यानंतर यात झपाट्याने घट नोंदली. 2011-12 आणि 2012-13 या काळात यात घट झाली आणि 2013-14 मध्ये यात काही प्रमाणात सुधारणा झाल्याचे दिसून आले. चालू आर्थिक वर्षात एप्रिल ते जानेवारी यादरम्यान देशी कंपन्यांची एकूण एफडीआय गुंतवणूक 29.34 अब्ज डॉलर राहिली. 2002-03 तथा 2003-04 या काळात काही मर्यादित विदेशी गुंतवणुकीनंतर यात हळूहळू सुधारणा झाली. 2004 मध्ये विदेशी गुंतवणूक धोरणाचे उदारीकरण होण्याचा हा परिणाम होता.