प. बंगालमध्ये 81%, सीमांध्रात 76% आणि युपीत 55% मतदान, जाणून घ्या प्रमुख घटना

लोकसभा निवडणुकीच्या आठव्या टप्प्यातील मतदानादरम्यान अमेठीतील एका शाळेत मतदान केंद्रामध्ये फळ्यावर कमळाचे चित्र पाहून राहुल गांधी कर्मचा-यांवर भडकले. कमळ ही भाजपची निवडणूक निशाणी आहे. त्यामुळे याबाबत निवडणूक आयोगाकडे तक्रार करणार असल्याचे राहुल गांधी म्हणाले. याचदरम्यान जेव्हा राहुल गांधी फुला गावात पोहोचले तेव्हा, ग्रामस्थांनी 'हर हर मोदी' च्या घोषणा सुरू केल्या. त्यामुळे राहुल गांधी पुन्हा भडकले. रागात त्यांनी गावक-यांना भाजपात प्रवेश करा, अशा शब्दांत सुनावले. गेल्या १० वर्षात राहुल गांधी कधीही त्यांच्या गावात आले नाही, असा आरोप गावक-यांनी केला आहे.

अमेठीचे खासदार राहिलेले संजय सिंह यांनी सुलतानपूरमध्ये वरूण गांधींचा कसलाही प्रभाव नाही त्यामुळे आम्हाला कोणतेही आव्हान नसल्याचे म्हटले आहे. संजय सिंह यांची पत्नी अमिता सिंह काँग्रेसच्या तिकीटावर वरूण गांधीविरोधात लढत आहेत. अमेठीत राहुल गांधी मोठी मते घेऊन विजयी होतील, असा विश्वासही त्यांनी व्यक्त केला.

दरम्यान, याआधी अमेठीमध्ये काँग्रेस कार्यकर्त्यांनी दोन मतदान केंद्रे त्यांच्या ताब्यात घेतली होती, असा आरोप आपचे उमेदवार कुमार विश्वास यांनी केला आहे. पत्रकारांशी बोलताना कुमार विश्वास यांचा आत्मविश्वास उंचावलेला दिसला. अमेठीत झाडू चालला, अशी प्रतिक्रिया त्यांनी दिली.

लोकसभा निवडणुकीच्या आठव्या टप्प्यात बुधवारी सात राज्यांत 64 मतदारसंघांत मतदानाला सुरुवात झाली आहे. यात उत्तर प्रदेशातून दिग्गजांसह सीमांध्र विधानसभा उमेदवारांचे भाग्य मतदानयंत्रांत बंद होईल.

याच टप्प्यात उत्तराखंडातील सर्व 5 व हिमाचल प्रदेशातील सर्व 4 जागांवर मतदान सुरु. यानंतर 12 मे रोजी शेवटच्या टप्प्यात 41 जागांवर मतदान होईल. 2 जूनंतर आंध्र प्रदेशाचे तेलंगणा व सीमांध्र अशा दोन राज्यांत विभाजन होईल. तेलंगणातील विधानसभा मतदारसंघांत 30 एप्रिलला मतदान झाले आहे. सीमांध्रच्या 175 विधानसभा मतदारसंघांत मतदान सुरु.

रिंगणातील दिग्गज उमेदवार
उत्तर प्रदेश : राहुल गांधी, स्मृती इराणी, कुमार विश्वास, वरुण गांधी, बेनीप्रसाद वर्मा, मोहंमद कैफ
बिहार : रामविलास पासवान, राबडीदेवी, राजीव प्रताप रुडी
हिमाचल : प्रतिभा सिंह, अनुराग ठाकूर

विविध राज्यांतील ताजी माहिती...

उत्तर प्रदेश
- उत्तर प्रदेशातील हा मतदानाचा पाचवा टप्पा असून १५ जागंसाठी मतदान होत आहे.
यात अमेठी, सुलतानपूर, प्रतापगड, कौशांबी, फूलपूर, अलाहाबाद, फैजाबाद, आंबेडकरनगर, बहराइच, केसरगंज, श्रावस्ती, गोंडा, बस्ती, संत कबीर नगर आणि भदोही यांचा समावेश आहे.
- या टप्प्यामध्ये राहुल गांधी, वरुण गांधी, स्मृती ईरानी, कुमार विश्वास, रेवती रमण सिंह, बेनी प्रसाद वर्मा, राजकुमारी रत्ना सिंह, किर्तीवर्धन सिंह, ब्रजभूषण शरणसिंह आणि निर्मल खत्री यांच्यासह 243 उमेदवारांचे भवितव्य पणाला लागले आहेत.

बिहार
- बिहारमध्ये लोकसभेच्या सात जागांसाठी आणि विधानसभेच्या दोन जागांसाठी पोटनिवडणूक होत आहे.
- लोकसभेच्या सात जागांसाठी येथे 118 उमेदवार रिंगणात आहेत.
- बिहारमध्ये ज्या मतदारसंघात मतदान सुरू आहे, त्यात शिवहर, सीतामढी, मुजफ्फरपूर, महाराजगंज, हाजीपूर, सारण, उजियारपूर यांचा समावेश आहे.

आंध्र प्रदेश
- जम्मालामाडुगू विधानसभा मतदारसंघात टीडीपी आणि वायएसआर काँग्रेसच्या कार्यकर्त्यांमध्ये तणाव निर्माण झाला होता.
- आंध्र प्रदेशात लोकसभा निवडणुकीबरोबरच सीमांध्र परिसरात विधानसभेच्या 175 जागांसाठीही मतदान सुरू आहे.
- नवीन राज्य निर्मीतीनंतर प्रथमच सीमांध्र परिसरात विधानसभा निवडणुका होत आहेत.
- येथे अरुकू, श्रीकाकुलम, विजयनगरम, विशाखापट्टनम, अनाकापल्ली, काकीनाडा, अमलापुरम, इलुरू, मछलीपट्टनम, विजयवाडा, गुंटूर, नरसारावपेट, बाप्पाटला, ओंगली, नांदयाल, कुरनूल, अनंतापूर, हिंदूपूर, कडप्पा, नेल्लोर,
तिरुपति, राजमपेट आणि चित्तूर या लोकसभा मतदारसंघात मतदान होत आहे.

पश्चिम बंगाल
- पश्चिम बंगालच्या सहा जागांसाठी 72 उमेदवार मैदानात आहेत.
- येथील झारग्राम, मिदनीपूर, पुरुलिया, बांकुरा, विष्णुपूर आणि आसनसोल या जागांसाठी मतदान सुरू आहे.
- या टप्प्यात डाव्यांसमोर त्यांच्या सहा जागा टिकवण्याचे आव्हान आहे.
- या टप्प्यात प्रामुख्याने नऊ वेळा खासदार राहिलेले वासुदेव आचार्य, अभिनेत्री मुनमुन सेन, संध्या राय आणि गायक बाबुल सुप्रियो यांचे भवितव्य ठरणार आहे.

जम्मू-कश्मीर
- लद्दाख आणि बारामुल्ला या दोन जागांसाठी मतदान सुरू.
- बारामुल्ला मतदारसंघात एका पोलिंगबूथच्या जवळ आईईडी ब्लास्ट झाल्याचे वृत्त आहे.

उत्तराखंड
- टिहरी गढवाल, पौढी गढवाल, अल्मोड़ा, नैनीताल, ऊधमसिंह नगर, हरिद्वार येथे मतदान सुरू आहे.