राष्ट्रवादी सावध: लक्ष्मण ढोबळेंचा पत्ता कट, रमेश कदमांना संधी!

संधीचे सोने केले
ढोबळे यांना बाजूला करताना मातंग समाजात दुसरे नेतृत्व उभे राहील याची राष्ट्रवादीने तजवीज केली. ढोबळे यांचे उजवे हात रमेश कदम यांनाच राष्ट्रवादीने हेरले. लोकशाहीर अण्णाभाऊ साठे आर्थिक विकास महामंडळाचे अध्यक्षपद त्यांच्याकडे सोपवण्यात आले. कदम यांनी मिळालेल्या संधीचे सोने केले. राष्ट्रीय अनुसूचित जाती विकास महामंडळाकडून १७ पट अधिक निधी खेचून आणला. महामंडळाच्या कर्जवाटपाचा कारभार ऑनलाइन केला. कर्जवाटपातील दलाली संपुष्टात आणली.

अस्वस्थ मातंग समाज : लोकसभेला अनुसूचित जातीसाठी राज्यात मतदारसंघ राखीव आहेत. तरीही एकाही पक्षाने मातंग उमेदवार दिलेला नव्हता. त्यामुळे सध्या मातंग युवक अस्वस्थ आहेत. राज्यात मातंग समाजाची ७० लाख लोकसंख्या असून, २० विधानसभा मतदारसंघात मातंग समाजाची मते निकालाचे पारडे बदलवू शकतात. ढोबळेंबद्दल मातंग समाजाला सहानुभूती असून, त्यांना उमेदवारी देण्याची मागणी केली जात आहे.

स्वस्त भाजीपाला चर्चेत
विधानसभा डोळ्यासमोर ठेवून रमेश कदम यांनी मुंबईत मातंग युवा परिषद भरवली. अजित पवार त्याचे उद्घाटक होते. कदम यांची मुंबईत "जोशाबा' नावाची संस्था आहे. त्यामार्फत ते स्वस्त भाजीपाला विक्री करतात. ढोबळेंचे कट्टर अनुयायी असलेले कदम यांनी आता ढोबळेंनाच पाठ दाखवून अजित पवार यांचे शिष्यत्व पत्करले आहे. ढोबळे यांनी स्वत:चा मतदारसंघ बांधला नाही. त्यात नुकताच त्यांच्यावर बलात्काराचाही गुन्हा दाखल झाला आहे. त्यामुळे तिकीट कापल्यास ढोबळे बंडखोरी करण्याची सुतराम शक्यता नाही.