माझ्या वडीलांची तुलना कोणाशीच होऊ शकत नाही, प्रियंका गांधींचे स्पष्टीकरण

भाजपचे पंतप्रधानपदाचे उमेदवार नरेंद्र मोदी यांनी काही दिवसांपूर्वी दूरदर्शनला दिलेल्या मुलाखतीत प्रियंका गांधी मला मुलीसारखी आहे, असे वक्तव्य केले होते. त्यामुळेच मी प्रियंकाबाबत काही बोलत नाही, असेही ते म्हणाले होते.

प्रियंका अमेठीत राहुल यांचा प्रचार करत होत्या. त्या वेळी पत्रकारांनी त्यांना मोदींच्या वक्तव्याबाबत प्रश्न विचारला. त्यावर प्रियंका म्हणाल्या, ‘20 वर्षांपूर्वी माझ्या वडिलांनी या देशासाठी प्राण अर्पण केले. ते माझे जगातील सर्वात आवडते व्यक्ती होते. त्यांची कोणत्याही व्यक्तीसोबत तुलना करणे मला आवडणार नाही.’ तत्पूर्वी मोदी यांच्या वक्तव्याबाबत चिदंबरम यांनाही प्रश्न विचारण्यात आला होता. चिदंबरम म्हणाले की, मोदी प्रियंका यांना मुलीसारखे मानतात हे ऐकून मी खुश आहे; पण त्या (प्रियंका) मोदी यांना पित्यासमान मानून खुश होतील की नाही, हे मला सांगता येणार नाही. दरम्यान, या वक्तव्यावर भाजपनेही पलटवार केला आहे. निर्मला सीतारमण म्हणाल्या की, मोदी जे म्हणाले ते भारतीय संस्कृतीला धरून आहे.