इराणवरील निर्बंध उठवले, युरोपियन संघटनेच्या प्रतिनिधींच्या बैठकीतील निर्णय

वॉशिंग्टन - व्हिएन्ना-जागतिक निरीक्षकांच्या आढाव्यानंतर इराणवरील तेल आणि आर्थिक निर्बंध उठवण्यात आले आहेत. अमेरिका आणि युरोपियन संघटनेच्या प्रतिनिधींच्या बैठकीत हा निर्णय घेण्यात आला. त्यानंतर इराणचे राष्ट्राध्यक्ष हसन रुहानी म्हणाले, देशासाठी हा नवीन अध्याय आहे.

अणू कार्यक्रमात घट करण्यासाठी गेल्या वर्षभरात इराणने योग्य पद्धतीने प्रयत्न केले आहेत, असा निर्वाळा अमेरिका आणि युरोपियन संघटनेच्या बैठकीनंतर जाहीर करण्यात आला. वास्तविक संयुक्त राष्ट्र, अमेरिका आणि युरोपियन राष्ट्र संघटनेकडून गेल्या अनेक वर्षांपासून इराणवर निर्बंध घालण्यात आले होते. अणू कार्यक्रमात घट करण्यासाठी इराणने दाखवलेल्या बांधिलकीमुळे आता गेल्या वर्षी मांडण्यात आलेल्या समझोत्याची अंमलबजावणी होणार आहे. कागदावर देण्यात आलेल्या आश्वासनांची प्रत्यक्षात पूर्तता केली जाईल, अशी ग्वाही इराणने दिली आहे, असे बैठकीनंतर अमेरिकेचे परराष्ट्रमंत्री जॉन केरी यांनी सांगितले.