पाकमध्‍ये रक्तपात: बाचा खान विद्यापीठात 25 जण ठार, 50 वर जखमी

पेशावर - वायव्य पाकिस्तानमधील खैबर पख्तुनख्वाहमधील बाचा खान विद्यापीठात बुधवारी अतिरेकी हल्ला झाला. त्यात २५ जण ठार तर ५० पेक्षा जास्त लोक जखमी झाले.

लष्कर आणि सुरक्षा दलांच्या कारवाईत हल्ला करणाऱ्या चार अतिरेक्यांना ठार मारण्यात आले. हल्ला झाला त्या वेळी विद्यापीठात ३००० विद्यार्थी आणि मुशायऱ्यासाठी आलेले ६०० अतिथी उपस्थित होते. हल्ला कोणी केला याबाबत वेगवेगळे वृत्त येत आहे. आधी तहरीक-ए-तालिबानचा कमांडर उमर मन्सूरने हल्ल्याची जबाबदारी घेतली. तो म्हणाला की, आमच्या चार जणांनी हा हल्ला केला आहे. २०१४ मध्ये पेशावरच्या आर्मी स्कूलमध्ये लष्कराकडून मारल्या गेलेल्यांच्या हत्येचा हा बदला आहे. आर्मी स्कूलवरील हल्ल्याचा मास्टरमाइंडही मन्सूरच होता. मात्र, संघटनेचा अधिकृत प्रवक्ता मोहंमद खोरासानी याने या हल्ल्यात आपला हात नाही, असे लेखी निवेदन जारी केले आहे. प्राथमिक तपासानुसार, अफगाणिस्तानमधून आलेल्या फोन कॉलचा या हल्ल्याशी संबंध असू शकतो.

जागतिक आर्थिक मंच परिषदेसाठी स्वित्झर्लंडमध्ये गेलेले पाकिस्तानचे पंतप्रधान नवाझ शरीफ यांनी हल्ल्याचा निषेध केला आहे. लष्करप्रमुख जनरल राहिल शरीफ यांनी पाहणी केली. राज्यपाल सरदार मेहताब खान हेही विद्यापीठात पोहोचले.