Home | Magazine | Madhurima | Mrinmayee Ranade writes about maturity

मोठे कधी होणार ?

मृण्मयी रानडे | Update - Jun 19, 2018, 03:00 AM IST

बसमध्ये समोर दोघीजणी गप्पा मारत होत्या. पंचविशीतल्या असतील. एक दुसरीला सांगत होती, तुझ्या मुलाला सगळं खायची सवय लाव हं,

  • Mrinmayee Ranade writes about maturity

    बसमध्ये समोर दोघीजणी गप्पा मारत होत्या. पंचविशीतल्या असतील. एक दुसरीला सांगत होती, तुझ्या मुलाला सगळं खायची सवय लाव हं, नाहीतर माझ्यासारखी अवस्था होईल. मला आईने लहानपणी फार लाडावून ठेवलं होतं. म्हणून माझे आता फार नखरे असतात खाण्यापिण्याचे.


    जर पंचविशीतल्या मुलीला हे कळतंय की, लहान असताना आईने केलेल्या लाडांमुळे तिला आज अनेक पदार्थ आवडत नाहीत, तर तिला हे कळत नाही का, की आपण आवडत नसलेले पदार्थही आता हळुहळू खाऊन पाहायला हवेत? सवयीने ते आवडू लागतील. किंवा आवडले नाहीत तरी आरोग्याला पोषक म्हणून खायला हवेत? भाज्या, फळं, खायला हवं, हे शाळेत शिकूनही वर्षं लोटली, तरीही पालथ्या घड्यावर पाणीच!


    असंही सांगणारे पुरुष असतात की, मी लहानपणापासून आईने सगळी कामं केलेली पाहात आलोय, आंघोळीचं पाणीसुद्धा तीच काढून देते आणि हातात चहाही तीच देते. तेव्हा विचारावंसं वाटतं की, लहान असताना तुला गरम पाणी घेता येत नसेल, पण आता तरी येतं ना? तुझी बायको नोकरी करणारी आहे, तुला एक लहान मुलगा आहे.


    तुझी इतकी सेवा करून कामावर जाणं बायकोला शक्य होणारेय का? तुझा मुलगा हेच पाहात मोठा होणारेय आणि तोही त्याच्या आई/बायकोकडून तीच अपेक्षा करणार आहे. तिशी ओलांडल्यावर स्वत:च्या आयुष्यात असे बदल घडवून आणायला दुसरं कोणी कशाला लागतं? आपल्या आपणच हे बदल घडवून आणू शकतो ना! त्यालाच तर सुजाण होणं, मॅच्युअर होणं, म्हणतात. नाहीतर नुसतं वय वाढलं असंच म्हणेल कोणीही.


    अठराव्या वर्षी भारतीय व्यक्ती प्रौढ होते. मग या वयानंतर, आपल्यातल्या कमतरतांबद्दल आईवडलांना दोषी ठरवणं थांबवून स्वत: सुधारणा घडवणं इतकं अशक्य आहे का? कधी शिकणार हे आपण? किती दिवस त्यांच्या कुबड्या घेऊन चालत राहणार? आपलं म्हणून आयुष्य कधी सुरू करणार? आणि आपल्या निर्णयांची जबाबदारी घेणार? आईवडीलही किती दिवस मुलांना आधार देत राहणार?

    मृण्मयी रानडे , मुंबई

    mrinmayee.r@dbcorp.in

Trending