Home | Magazine | Madhurima | fashion-earrings-lata

झुमका गिरा रे!

लता टाकळकर, औरंगाबाद | Update - Jun 10, 2011, 03:14 PM IST

कर्णभूषणांमध्ये मोत्यांची कुडी, झुपके, वेल कुडकं, बुगडी यांची चलती आहे....

  • fashion-earrings-lata

    कर्णभूषणे हा स्त्रियांचा सर्वात प्रिय अलंकार असून तो अत्यंत प्राचीन अलंकार आहे. ऋग्वेद तसेच अर्थवेदात याचा उल्लेख आढळतो. आधुनिक काळात विविध धातूची, विविध आकारांची, विविध नाजूक नक्षीची कर्णभूषणं बनवली जातात. कर्णभूषणांमध्ये मोत्यांची कुडी, झुपके, वेल कुडकं, बुगडी यांची चलती आहे. हल्लीच्या काळात या प्रकारची आभूषणे फारच प्रचलित आहेत.
    कुंडल व कर्णिका अशा दोन प्रकारांत कर्णभूषणे वापरली जायची. कर्णिका कानाच्या वरच्या भागात, तर कुंडल खालच्या भागात घातली जायची. सापाच्या वेटोळ्याप्रमाणे कुंडले वलयाकृती असत. प्राचीन काळी कानात अशी कुंडले वापरली जायची. कुंडलाला नाना प्रकारची रत्नेही जडवली जायची. हेच आधुनिक काळात रिंग बनून आले. मकर कुंडल हा लोकप्रिय प्रकार अत्यंत कौशल्याने बनविलेला असतो. स्त्रियांच्या कानात माशाच्या आकाराची कुंडले आजही दिसतात. भिकबाळी या कर्णकुंडलात दोन मोती असून मधला खडा पाचू, माणिक इत्यादी रत्नांचा असे.
    महाराष्टÑातल्या स्त्रिया जुन्या काळी बाळ्या-बुगड्या, बेल-भोकरे, सोन्या-मोत्याच्या कुड्या घालत असत. आजही कुड्या हा प्रकार महिलांना आवडतो. स्टायलिश डायमंड डँगलर्स म्हणजे लेटेस्ट स्टाइल स्टेटमंट आहेत. आउटफिट पारंपरिक असो, वेस्टर्न, इंडोवेस्टर्न असो; कोणत्याही ड्रेसवर ते शोभून दिसतात. कटस्टोन कलाकुसर, जरीकाम, खडे व सजलेल्या मीनाकारीने अप्रतिम डिझाइनच्या स्लीक, स्मार्ट इयर रिंग्ज असोत वा झोके घेणारे वाळे किंवा गोल गरगरीत झुमके असोत; समारंभ वा उत्सवाच्या खास पर्वात छान उठून दिसतात व हरेक पोशाखाला शोभूनही दिसतात.
    अद्भुत डिझाइन, अत्याधुनिक फॅशन-ट्रेण्डी स्ट्राइलमध्ये उपलब्ध असलेले हे वैशिष्ट्यपूर्ण क्लासिक झुमके कुणाही आधुनिक स्वप्नसुंदरीचा वीक पॉइंट ठरले नाही, तरच नवल!

Trending