घाटनांद्रा घाटात आढळला बेपत्ता 15 वर्षीय मुलीचा मृतदेह, 24 तासांपासून होती बेपत्ता

स्व. स्वातंत्र्यसैनिक सरिचंद राठोड विद्यालयात १० वी वर्गात  सीमा रामा राठोड (१५) शिक्षण घेत होती. आई मजुरी करण्यासाठी व वडील शेळ्या चारण्यासाठी जंगलात गेले होते. त्यामुळे शुक्रवारी शाळा सुटल्यानंतर आईला मदत म्हणून आपण स्वयंपाक करून ठेवू. दिवसभर काम करून थकलेल्या आईस तितकीच मदत होईल म्हणून भाकरी  टाकण्यासाठी पिठाचा डबा काढला, माठात पाणी घेण्यासाठी गेली, पण माठ कोरडा होता, त्यामुळे  पीठ झाकून सीमा पाणी आणण्यासाठी गावाजवळील विहिरीवर गेली. गावात पाइपलाइनचे काम सुरू असल्याने तीन-चार दिवसांपासून नळाला पाणी आलेले नव्हते. सीमा पाणी घेऊन परत आली नाही  म्हणून आई -वडिलांनी व गावातील मंडळींनी सीमाचा शोध घेतला. नातेवाइकांना फोन करून विचारले, पण रात्री उशिरापर्यंत तपास लागला नाही. म्हणून सकाळी पुन्हा शोध घेण्यास सुरुवात केली व बनोटी दूरक्षेत्रात तक्रार दाखल करण्यासाठी गेले, तेव्हा पोलिस शिपाई योगेश झाल्टे यांना दूरध्वनी आला की घाटनांद्रा घाटात एका मुलीचा मृतदेह पडलेला आहे, अशी माहिती मिळाली. ग्रामस्थ व नातेवाइकांनी मृतदेह सीमाचाच आहे, असे सांगितले.