मनपाकडे जेसीबीचे पंक्चर काढण्यासही पैसे नाहीत !

औरंगाबाद - सात अब्ज रुपयांचे वार्षिक अंदाजपत्रक असलेल्या महानगरपालिकेकडे पैसे नाहीत, असे कोणालाही सांगितले तर आश्चर्य वाटेल; परंतु हे वास्तव आहे. १०० रुपये इतका खर्च असलेले जेसीबीच्या टायरचे पंक्चर काढण्यासाठी या संस्थेकडे पैसे नसल्याचे समोर आले. त्यामुळे कचरा जमा करण्याचे काम करणारे जेसीबी तीन दिवसांपासून उभे आहे. नूतन सभागृह नेते राजेंद्र जंजाळ यांच्यासमोर हा प्रकार आल्यानंतर त्यांनी आधी अत्यावश्यक कामांसाठी पैसे राखून ठेवा, अशी सूचना लेखा विभागाला केली. मनपातील सहा वॉर्डांसाठी कचरा संकलनास करण्यास प्रत्येकी दोन जेसीबी आहेत. तांत्रिक विभागाने याची देखभाल दुरुस्ती करणे अपेक्षित आहे. मात्र, तेही होत नसल्याचे मंगळवारी जंजाळ यांनी घेतलेल्या बैठकीत समोर आले.