राज्यात स्वाईन फ्लूचे थैमान : 4 दिवसांत 10 जणांचे बळी,...अशी घ्या काळजी

 

औरंगाबादमध्ये ‘स्वाइन फ्लू’तून बरे झालेल्या रुग्णाचा जंतुसंसर्गामुळे मृत्यू...

पुंडलिक नगर भागात राहाणाऱ्या संजय पहाडे या ४२ वर्षीय इसमाचा  सोमवारी मध्यरात्री कमलनयन बजाज रुग्णालयात मृत्यू झाला. महिनाभरापूर्वी स्वाईन फ्लूची लागण झाल्याने त्यांना रुग्णालयात दाखल करण्यात आले होतेे. त्यातून ते बरे झाले; मात्र नंतर जंतू संसर्ग झाल्याने त्यांना प्राण गमवावे लागले.   

 

जिल्हा शल्यचिकित्सक डॉ. जी. एम. गायकवाड यांनी दिलेल्या माहितीनुसार, १० एप्रिल रोजी संजय पहाडे यांना कमलनयन बजाज रुग्णालयात दाखल करण्यात आले होते. त्यांना स्वाइन फ्लू झाल्याचे निदान करण्यात आले. या आजारातून ते बरेही झाले होते. मात्र, उपचारादरम्यान लावण्यात आलेल्या कृत्रिम श्वासोच्छवासात जंतुसंसर्ग झाल्याने  त्यांचा मृत्यू झाला. दरम्यान, याविषयी रुग्णालयाचे मुख्य कार्यकारी अधिकारी डॉ. शमीम अहेमद खान यांच्याशी संपर्क साधून रुग्णालयाची बाजू जाणून घेण्याचा प्रयत्न केला असता त्यांनी पहाडे यांच्या मृत्यूबाबत काहीही सांगण्यास नकार दिला. आम्ही रुग्णाची सर्व माहिती जिल्हा शल्यचिकित्सकांना दिली असून याविषयावर त्यांच्याशीच बोला,  असा सल्ला त्यांनी दिला.  रुग्णालयांमध्ये  जंतुसंसर्ग झाल्यास अनेक रुग्ण दगावतात, एवढेच त्यांनी स्पष्ट केले.  

घाटीत पाच रुग्णांवर उपचार : दरम्यान, घाटी रुग्णालयात स्वाइन फ्लूवरील उपचार घेत असलेल्या ७ रुग्णांपैकी दोन रुग्ण पूर्णपणे बरे हाेऊन घरी परतले आहेत. उर्वरित ५ रुग्णांपैकी २ रुग्णांचा अहवाल पॉझिटिव्ह आला असून  २ जणांचा निगेटिव्ह, तर एका रुग्णावर संशयित म्हणून उपचार सुरू आहेत, असे डॉ. गायकवाड यांनी सांगितले.