सासरकडील मंडळींनीच केला सुमित्रा होंडेंचा खून\'

अंबड - शत्रूसुद्धा झोपेत गोळ्या घालत नाही. माझ्या मुलीला मात्र झोपेत गोळ्या घालून ठार केले. तिची चूक काय? तिचा कट करून खून करण्यात आला असून विलास हाेंडे हा एकमेव आरोपी नाही. यात सासरच्या अन्य मंडळींचाही समावेश आहे. आपण पाेलिसांना ११ जानेवारी रोजीच सविस्तर फिर्याद दिली. यात तिचा पती सतीश अण्णासाहेब होंडे, दीर डॉ. भरत अण्णासाहेब होंडे, जाऊ डॉ. सीमा भरत होंडे, सासरे अण्णासाहेब होंडे व चुलत सासरे नानासाहेब होंडे या ५ जणांची नावे दिली, मात्र त्यावर काहीच कारवाई करण्यात आली नाही. या प्रकरणात पोलिसांची भूमिका संशयास्पद असून या गुन्ह्याचा तपास सीआयडीमार्फत करण्यात यावा, अशी मागणी मृत सुमित्रा होंडे यांचे वडील विश्वंभर तारख यांनी पत्रकार परिषदेत केली.  

विश्वंभर तारख यांनी शनिवारी दुपारी अंबड येथील शासकीय विश्रामगृहात पत्रकारांशी संवाद साधला. आपल्या मुलीच्या मृत्यूचे कारण स्पष्ट व्हावे यासाठी आपण संघर्ष करीत राहणार असल्याचे त्यांनी सांगितले. ते म्हणाले, मी ११ जानेवारी रोजी तपासी अधिकारी तथा उपविभागीय पोलिस अधिकारी रमेश सोनुने यांच्याकडे पुन्हा एक फिर्याद दिली. त्यात माझ्या मुलीचे मारेकरी हे घरातीलच लोक असून मी ५ जणांची नावे पोलिसांना दिली होती. यावर कोणतीच कारवाई झाली नाही.