एक डोळा निवडणुकीवर अन् दुसरा मंत्रिपदावर, युती झाल्यास शिरसाटांची शक्यता

औरंगाबाद- एप्रिल महिन्यात होत असलेल्या महापालिका निवडणुकीत आपापली ताकद दाखवायला भाजप आणि शिवसेना पुन्हा सरसावत असून त्यासाठी स्थानिक नेत्याकडे मंत्रिपद यावे यासाठी जोरदार हालचाली सुरू आहेत. भाजपकडून अतुल सावे व हरिभाऊ बागडे ही दोन नावे शर्यतीत आहेत. तर युती होण्याची शक्यता असल्याने शिवसेनेचे संजय शिरसाटही शर्यतीत आहेत. येत्या काही दिवसांत हे चित्र स्पष्ट होणार आहे. विधानसभा निवडणुका स्वतंत्रपणे लढलेल्या शिवसेना व भाजपची आता युती होण्याची शक्यता दिसत आहे. त्या दृष्टीने मुंबईत हालचालींना वेग आला आहे. निर्णय काय होतो याकडे दोन्ही पक्षांच्या स्थानिक नेत्यांचे लक्ष लागून राहिले आहे. या निर्णयावर दोन्ही पक्षांच्या महापालिका निवडणुकांबाबतच्या हालचाली अवलंबून आहेत.