Home | Maharashtra | Marathwada | Other Marathwada | Amit Deshmukh Latest News in Marathi

अमित देशमुखांचे मंत्रिपद हुकले, फौजिया खान यांचे राज्यमंत्रिपद सुरक्षित

अनिल पौलकर/ प्रवीण देशपांडे | Update - May 30, 2014, 06:41 AM IST

लातूरमधून काँग्रेस उमेदवाराचा मोठ्या फरकाने पराभव झाल्यामुळे नाव मागे पडले

  • Amit Deshmukh Latest News in Marathi
    लातूर - दिवंगत नेते विलासराव देशमुख यांचे पुत्र आमदार अमित यांचा गुरुवारी शपथविधी होईल आणि त्यांना राज्यमंत्रिपद बहाल केले जाईल, अशी शक्यता होती. मात्र, त्यांना मंत्रिपदाने पुन्हा एकदा हुलकावणी दिली. लोकसभा निवडणुकीत लातूरमधून काँग्रेस उमेदवाराचा मोठ्या फरकाने पराभव झाल्यामुळेच त्यांचे नाव ऐनवेळी मागे पडल्याची माहिती आहे. त्यामुळे येत्या काळात त्यांना पुन्हा एकदा स्वत:ला सिद्ध करावे लागणार आहे. लातूर जिल्ह्याला शिवराज पाटील, शिवाजीराव पाटील निलंगेकर, विलासराव देशमुख या नेत्यांचा आणि त्यांच्या रूपानं मिळालेल्या मंत्रिपदाचा मोठा वारसा आहे.
    युतीचा काळ वगळला तर काँग्रेसच्या सत्ता काळात लातूरला कायम मंत्रिपद मिळालं. केशवराव सोनवणे यांच्या रूपानं जिल्ह्याला पहिल्यांदा सहकारमंत्रिपद मिळालं. त्यानंतर शिवराज पाटील यांच्या रूपानं केंद्रात विविध खात्याची मंत्रिपदं, निलंगेकरांच्या रूपानं पाटबंधारे खातं, एकदा मुख्यमंत्रिपद मिळालं. विलासरावांकडे तर जवळपास प्रत्येक खात्याचा भार होता. दोनदा मुख्यमंत्रिपद मिळवणार्‍या विलासरावांच्या माध्यमातून जिल्ह्याला साडेसात वर्षे राज्याचं नेतृत्व करता आलं. मधल्या काळात त्यांचं पद गेल्यानंतर त्यांचे बंधू दिलीपराव मंत्री झाले. पुढं विलासराव केंद्रातही मंत्री झाले आणि अखेरपर्यंत कार्यरत राहिले. मात्र, विलासरावांच्या पश्चात लातूरला मंत्रिपद मिळालं नाही. विलासरावांची ताकद, त्यांच्या मागे असलेला आमदारांचा मोठा गट पाहता त्यांचे पुत्र आमदार अमित देशमुख यांना सहजपणे मंत्रिपद मिळेल, असा सगळ्यांचा अंदाज होता. मुख्यमंत्री पृथ्वीराज चव्हाण यांच्या मंत्रिमंडळाचा जेव्हा-जेव्हा विस्तार करायची वेळ आली तेव्हा-तेव्हा अमित देशमुखांचे नाव आघाडीवर असायचे. मात्र प्रत्येकवेळी त्यांचा ऐनवेळी पत्ता कटला. विलासराव देशमुखांचे पक्षअंतर्गत विरोधक असलेल्या गटाकडून अमित यांना मंत्रिपद मिळू नये, यासाठी फिल्डिंग लावली जात आहे. दिल्लीत अहमद पटेल यांचे विलासरावांशी चांगले संबंध होते. पण अद्याप त्यांचा अमित यांच्याशी सूर जुळलेला नाही. त्यामुळे दिल्लीत अमित देशमुखांची वकिली करणारे कुणी नसल्यामुळेच त्यांचे नाव सातत्याने मागे पडले आहे.
    विलासरावांचा गट विसर्जित
    विलासराव देशमुख मुख्यमंत्री असताना राज्यात त्यांचा दबदबा होता. राज्य मंत्रिमंडळातील अनेकांचे ते गॉडफादर होते. 40-50 आमदारांचा गट त्यांच्या पाठीशी होता. अत्यंत चाणाक्ष, राजकीय टायमिंगचे भान असलेला नेता म्हणून विलासरावांची ओळख होती. राजकीय उट्टे काढण्यात वाकबगार असलेल्या विलासरावांना पक्षांतर्गत विरोधक टरकून असायचे. त्यांच्या पश्चात अमित देशमुख यांनी मात्र अत्यंत सावधपणे राजकीय पावले टाकली आहेत. वेगळा गट, आपले समर्थक अशा भानगडीत ते पडले नाहीत. त्यामुळे राज्याच्या राजकारणातील विलासरावांचा गट विसर्जित झाला आहे. त्यामुळे काँग्रेसची ताकदही विखुरली आहे.
    मराठवाड्यात काँग्रेस कुठे?
    राज्यात लोकसभेच्या केवळ दोन जागा आल्या, त्याही मराठवाड्यातल्या नांदेड आणि हिंगोलीमधून. मात्र, मराठवाड्यात काँग्रेसचा नेता कोण, असा प्रश्न केल्यावर त्याचे उत्तर काँग्रसेच्याच कार्यकर्त्यांना देता येत नाही. अशोक चव्हाण असे उत्तर द्यायचे, तर ते आदर्शमध्ये सापडलेले. राजेंद्र दर्डा मंत्री असले, तरी औरंगाबादच्या बाहेर ते लक्ष घालत नाहीत. डी. पी. सावंत अशोक चव्हाणांच्या सावलीतून बाहेरच पडले नाहीत आणि मधुकरराव चव्हाण यांना उस्मानाबादच सांभाळणे मुश्कील. अशा परिस्थितीत अमित देशमुखांसारख्या युवा आमदाराकडे मंत्रिपद देऊन त्यांना ताकद दिल्यास नेतृत्व विकसित करता आले असते. मात्र, काँग्रेसच्या पक्षश्रेष्ठींचा विचार काही वेगळाच असल्याचे वारंवार दिसले आहे.
  • Amit Deshmukh Latest News in Marathi
    फौजिया खान यांचे राज्यमंत्रिपद सुरक्षित; वगळण्याच्या चर्चेला पूर्णविराम 
     
    परभणी  - शालेय शिक्षण व सार्वजनिक आरोग्य राज्यमंत्री फौजिया खान यांना राज्याच्या मंत्रिमंडळातून वगळण्याच्या चर्चेला गुरुवारी पूर्णविराम मिळाला. राज्य मंत्रिमंडळात फेरबदल करण्यात न आल्याने राज्यमंत्री फौजिया खान यांना आणखी साडेतीन महिने मंत्रिपदाचा लाभ मिळणार आहे.  
     राष्ट्रवादी काँग्रेसच्या राज्य मंत्रिमंडळातील रिक्त जागेवर गुरुवारी पक्षाचे कार्याध्यक्ष जितेंद्र आव्हाड यांनी मंत्रिपदाची शपथ घेतली. त्यामुळे मंत्रिमंडळात कोणतेही फेरबदल झाले नाहीत. लोकसभा निवडणुकीनंतर राज्यमंत्री फौजिया खान यांना मंत्रिमंडळातून वगळले जाईल, अशी चर्चा होती. त्यात फौजिया खान यांचा विधान परिषदेच्या सदस्यत्वाचा कालावधी एप्रिलमध्ये संपलेला आहे. त्यांनी विजय भांबळे यांच्याविरोधात प्रचार केल्याचा ठपका ठेवत पक्षाने त्यांना कारणे दाखवा नोटीस बजावली होती. खान यांनी मुंबईतील बैठकीत पक्षांतर्गत गटबाजी ही आपल्या कामावर शंका व्यक्त करून तक्रारी करीत असल्याचे नमूद केले होते.
     
    सलग 12 वर्षे सदस्यत्व 
    राज्यमंत्री खान यांच्या जागेवर माजी केंद्रीय राज्यमंत्री सूर्यकांता पाटील वा शरद गावित यांची वर्णी राष्टवादीकडून लागेल, असा राजकीय होरा होता, परंतु पक्षाने कोणतेही फेरबदल मंत्रिमंडळात केलेले नाहीत. त्यामुळे त्या मंत्रिमंडळात राहणार असल्याचे स्पष्ट झाले आहे. त्यांची विधान परिषद सदस्यत्वाची मुदत संपली असली तरी पुन्हा संधी मिळेल की नाही, ही बाब महिनाभरातच कळेल.
  • Amit Deshmukh Latest News in Marathi
    सूर्यकांता पाटील यांच्यासह सहा जणांना आमदारकी !
     
    नांदेड - राज्यपालनियुक्त आमदारांच्या नियुक्त्या करण्यासाठी राष्ट्रवादी काँग्रेसने आपल्या कोट्यातील सहा जणांची नावे निश्चित केली असून, ती लवकरच राज्यपालांना पाठवण्यात येणार आहे. मार्चमध्ये मुदत संपलेल्या या आमदारांपैकी प्रकाश शेंडगेंचे सदस्यत्व कायम ठेवत पक्षाने माजी केंद्रीय मंत्री सूर्यकांता पाटील, ख्वाजा बेग, विजय कांबळे, शिवाजीराव ग्ांर्जे आणि अशोक सावंत यांना संधी देण्याचे निश्चित केले आहे. दरम्यान, काँग्रेसनेही आपल्या कोट्यातील सहा सदस्यांची नावे निश्चित केली आहेत. प्रदेश काँग्रेसचे नेते शुक्रवारी सोनिया गांधी यांच्याशी चर्चा केल्यानंतर ही नावे जाहीर करणार आहेत.

Trending